پیانگ یانگ (شِنہوا) عوامی جمہوریہ کوریا (ڈی پی آر کے) کے وزیر دفاع کم سونگ گی نے خبردار کیا ہے کہ اگر امریکہ اور اس کے اتحادیوں نے ایک نئی فوجی محاذ آرائی کو ہوا دینے کی کوشش کی تو ان کا ملک سخت جوابی اقدامات کرے گا۔
سرکاری کورین سنٹرل نیوز ایجنسی (کے سی این اے) کے مطابق ڈی پی آر کے کے وزیر دفاع نے ان خیالات کا اظہار امریکہ، جاپان اور جمہوریہ کوریا (آر او کے) کی جاری مشترکہ فریڈم ایج فوجی مشقوں سے متعلق کیا۔
کم نے کہا کہ امریکی فوج جاپان اور آسٹریلیا کے ساتھ 8 سے 24 ستمبر تک اب تک کی سب سے بڑی مشترکہ فوجی مشقیں اورینٹ شیلڈ منعقد کرنے کی منصوبہ بندی کر رہی ہے۔
کم نے نشاندہی کی کہ ’’امریکہ، جاپان اور جمہوریہ کوریا کا سہ فریقی فوجی تعاون کا نظام ایک خطرناک جارحانہ شکل اختیار کر رہا ہے۔ انہوں نے اس بات پر زور دیا کہ امریکہ کی قیادت میں ایک کے بعد ایک جنگی مظاہرہ کیا جا رہا ہے جو جزیرہ نما کوریا اور دیگر خطوں کو عدم استحکام کی انتہا تک پہنچا رہے ہیں۔
عوامی جمہوریہ کوریا کے فوجی عہدیدار نے امریکہ اور اس کے حواری ممالک کے ان غیر ذمہ دارانہ فوجی اقدامات کی مذمت کی جن کا مقصد جزیرہ نما کوریا پر سنگین فوجی محاذ آرائی اور تصادم کے امکانات پیدا کرنا ہے اور ان کے باعث سامنے آنے والے نتائج سے بھی خبردار کیا۔
کم نے مزید کہا کہ اگر ضرورت پڑی تو عوامی جمہوریہ کوریا ’’دشمنوں کی چالوں کا جواب مزید طاقتور اور پرعزم عملی اقدامات سے دے گا۔‘‘