بیجنگ (شِنہوا) چین نے جمہوریہ کوریا (آر او کے) پر زور دیا ہے کہ وہ اپنے سیاسی وعدوں کی پاسداری کرے اور عملی اقدامات کے ذریعے ’’ایک چین‘‘ کے اصول کی حمایت کرے۔
چینی وزارت خارجہ کے ترجمان گو جیاکن نے یہ بات اس وقت کہی جب چینی نمائش ٹیم نے منتظمین کے تائیوان سے متعلق غلط طرز عمل کے خلاف شدید احتجاج کرتے ہوئے جمہوریہ کوریا میں منعقد ہونے والے گوانگ جو بینالے سے دستبردار ہونے کا اعلان کیا۔
گو نے کہا کہ چین اور جمہوریہ کوریا کے درمیان سفارتی تعلقات کے قیام سے متعلق مشترکہ اعلامیے میں واضح طور پر کہا گیا ہے کہ ’’جمہوریہ کوریا کی حکومت عوامی جمہوریہ چین کی حکومت کو چین کی واحد قانونی حکومت تسلیم کرتی ہے اور چین کے اس موقف کا احترام کرتی ہے کہ صرف ایک چین ہے اور تائیوان چین کا حصہ ہے۔‘‘
ترجمان نے کہا کہ جمہوریہ کوریا نے بھی رواں سال متعدد مواقع پر واضح طور پر کہا ہے کہ ’’ایک چین‘‘ کے موقف سے اس کی وابستگی میں کوئی تبدیلی نہیں آئی۔
تاہم گو نے کہا کہ جمہوریہ کوریا میں گوانگ جو بینالے کے منتظم نے اس غلط اقدام پر بضد رہتے ہوئے چین کے تائیوان خطے کو ایسی شناخت کے تحت شرکت کی اجازت دی جو اس کی حیثیت سے مکمل طور پر مطابقت نہیں رکھتی۔ انہوں نے مزید کہا کہ یہ ’’ایک چین‘‘ کے اصول کی سنگین خلاف ورزی ہے۔
چینی ترجمان نے کہا کہ چین اس اقدام کی سختی سے مخالفت کرتا ہے اور اس معاملے پر جمہوریہ کوریا کے حکام کے سامننے شدید احتجاج ریکارڈ کرا چکا ہے جبکہ متعلقہ فریق سے مطالبہ کیا گیا ہے کہ وہ فوری طور پر اپنی غلط کارروائی درست کرے۔