لوساکا (شِنہوا) ایک چینی کمپنی نے زیمبیا کی حکومت کو 100 آئل ٹینکرز فراہم کئے ہیں تاکہ پٹرولیم کے شعبے میں نوجوانوں کی شرکت بڑھائی جا سکے۔
یہ آئل ٹینکرز کنگ لانگ موٹرز زیمبیا لمیٹڈ نے عطیہ کئے جنہیں دارالحکومت لوساکا میں منعقدہ ایک تقریب کے دوران زیمبیا کی وزارت نوجوانان، کھیل اور فنون کے حوالے کیا گیا۔ ان سے ملک بھر میں تقریباً 12 ہزار نوجوانوں کو براہ راست اور بالواسطہ فائدہ پہنچنے کی توقع ہے۔
تقریب سے خطاب کرتے ہوئے چینی کمپنی کے منیجر وو چھون منگ نے کہا کہ یہ شراکت داری نوجوانوں کو بااختیار بنانے کے لئے زیمبیا کی حکومت کی کوششوں میں نجی شعبے کے تعاون کا ثبوت ہے۔
انہوں نے کہا کہ ہم مستفید ہونے والی کوآپریٹو تنظیموں پر زور دیتے ہیں کہ وہ ان اثاثوں کی ذمہ داری سنبھالیں، انہیں ذمہ داری سے استعمال اور برقرار رکھیں اور انہیں آمدنی اور روزگار کے پائیدار ذرائع میں تبدیل کریں۔
وزارت نوجوانان، کھیل اور فنون کے مستقل سیکرٹری چیلے شے کانگوا نے کہا کہ یہ آئل ٹینکرز حوالے کرنا حکومت کی جانب سے نوجوانوں کی بے روزگاری سے نمٹنے اور پٹرولیم کے شعبے میں مقامی لوگوں کی شرکت بڑھانے کی کوششوں میں ایک اہم سنگ میل ہے۔
نوجوانوں کو مختلف شعبوں میں بااختیار بنانے کا پروگرام 2020 میں شروع کیا گیا تھا۔ اس کا مقصد زیمبیا بھر میں نوجوان کاروباری افراد کو تجارتی اثاثے فراہم کرکے انہیں بااختیار بنانا تھا تاکہ وہ پٹرولیم کے شعبے میں حصہ لے سکیں اور منافع کو ملک کے اندر برقرار رکھنے میں مدد ملے۔
کانگوا نے کہا کہ حکومت اس بات کو یقینی بنانے کے لئے پرعزم ہے کہ یہ پروگرام کارآمد اثاثوں، پائیدار کاروبار اور نوجوانوں کے بہتر معاشی حالات میں تبدیل ہو۔