اسلام آباد(نیشنل ٹائمز) وفاقی وزیر پٹرولیم علی پرویز ملک اور گورنر خیبرپختونخوا فیصل کریم کنڈی سے پاکستان میں آذربائیجان کے سبکدوش ہونے والے سفیر خضر فرہادوف نے الگ الگ الوداعی ملاقاتیں کیں، جن میں پاکستان اور آذربائیجان کے درمیان دوطرفہ تعلقات، توانائی، تجارت، سرمایہ کاری اور دیگر شعبوں میں تعاون مزید مضبوط بنانے کے عزم کا اعادہ کیا گیا۔علی پرویز ملک نے سفیر خضر فرہادوف کی خدمات کو سراہتے ہوئے کہا کہ پاکستانی کمپنیوں اور سوکار کے درمیان توانائی کے شعبے میں تعاون میں نمایاں اضافہ ہوا ، جبکہ پاکستان آذربائیجان کے ساتھ بالخصوص پٹرولیم اور توانائی کے شعبوں میں شراکت داری کو مزید وسعت دینے کے لیے پُرعزم ہے ۔دوسری جانب گورنر خیبر پختونخوا فیصل کریم کنڈی سے بھی الوداعی ملاقات کی ، گورنر نے سفیر کے اعزاز میں ظہرانہ بھی دیا، اس موقع پر گفتگو کرتے ہوئے گورنر نے کہا کہ آذربائیجان پاکستان کا قابلِ اعتماد اور آزمودہ دوست ہے ۔
جس نے ہر اہم موقع پر پاکستان کا ساتھ دیا۔ انہوں نے دونوں ممالک کے درمیان تجارت، سرمایہ کاری، سیاحت، تعلیم اور دفاع سمیت مختلف شعبوں میں تعاون کے وسیع مواقع سے بھرپور استفادہ کرنے پر زور دیا۔سفیر خضر فرہادوف نے پاکستان میں قیام کو خوشگوار اور یادگار قرار دیتے ہوئے حکومت پاکستان کی میزبانی پر شکریہ ادا کیا۔ انہوں نے کہا کہ براہِ راست پروازوں سے عوامی روابط، سیاحت اور کاروباری سرگرمیوں کو فروغ ملا ہے ، آذربائیجان پاکستان، خصوصاً خیبرپختونخوا میں توانائی، سیاحت، معدنیات، زراعت اور انفراسٹرکچر کے شعبوں میں سرمایہ کاری اور مشترکہ منصوبوں کا خواہاں ہے ۔
