بیجنگ (شِنہوا) بہتر معاشی صورتحال اور فیکٹری سطح پر قیمتوں کی بحالی کے باعث 2026 کی پہلی ششماہی کے دوران چین کی ٹیکس آمدن گزشتہ سال کے اسی عرصے کی نسبت 4.9 فیصد اضافے کے ساتھ 100 کھرب یوآن (تقریباً 14.7 کھرب امریکی ڈالر) سے بڑھ گئی ہے۔
یہ اعداد و شمار برآمدی ٹیکس چھوٹ منہا کرنے سے پہلے کے ہیں جبکہ اس میں کسٹمز کے حکام کا جمع کیا گیا درآمدی ویلیو ایڈڈ ٹیکس، کھپت ٹیکس، کسٹمز ڈیوٹیز اور بحری جہازوں کے حجم پر عائد ٹیکس شامل نہیں۔
چین کی ریاستی ٹیکس انتظامیہ کے سربراہ ہو جنگ لین نے ایک پریس کانفرنس میں بتایا کہ جنوری سے جون کے عرصے میں مجموعی ملکی ٹیکس اور فیسوں کی آمدن 167 کھرب یوآن تک پہنچ گئی ہے۔ اس دوران سماجی تحفظ کا بیمہ 45 کھرب یوآن رہا جبکہ غیر ٹیکس آمدن 18 کھرب یوآن ریکارڈ کی گئی۔
ہو جنگ لین نے ٹیکس آمدن میں اس اضافے کی وجہ مستحکم معاشی کارکردگی، پروڈیوسر پرائس انڈیکس کی مسلسل بحالی، جو ٹیکس آمدن سے براہ راست منسلک ہے اور ابھرتے ہوئے شعبوں سمیت اہم صنعتوں میں موثر پیش رفت کو قرار دیا۔ 2026 کی پہلی ششماہی میں چین کی مجموعی ملکی پیداوار (جی ڈی پی) میں سالانہ بنیاد پر 4.7 فیصد اضافہ ہوا۔
جاری اعداد و شمار سے یہ بھی معلوم ہوا کہ اس عرصے کے دوران پنشن، صحت عامہ، تعلیم اور روزگار کے لئے ترجیحی پالیسیوں کے تحت ٹیکس اور فیسوں میں دی گئی چھوٹ میں سالانہ بنیاد پر 11.8 فیصد اضافہ ہوا۔ تقریباً 12 کروڑ 60 لاکھ ٹیکس دہندگان نے بزرگوں کی دیکھ بھال، علاج معالجے اور تعلیم سمیت دیگر اخراجات کی مد میں اضافی انفرادی انکم ٹیکس چھوٹ حاصل کی جو گزشتہ سال کی نسبت 5.9 فیصد زیادہ ہے۔