بیجنگ (شِنہوا) چین کی وزارت عوامی تحفظ نے کہا ہے کہ رواں سال کے آغاز سے چین اور امریکہ کے قانون نافذ کرنے والے اداروں نے انسداد منشیات ، ٹیلی کام اور آن لائن فراڈ کے خلاف کارروائیوں اور مفرور ملزمان کی حوالگی سمیت مختلف شعبوں میں عملی تعاون کیا ہے جس کے نتیجے میں نمایاں کامیابیاں حاصل ہوئی ہیں۔
وزارت کے مطابق انسداد منشیات کے شعبے میں چین اور امریکہ نے مشترکہ کارروائیوں کے ذریعے منشیات کی سمگلنگ، منشیات کی غیر قانونی تجارت اور نئی نفسیاتی اثرات پیدا کرنے والی ممنوعہ ادویات کی بین الاقوامی سمگلنگ کے کئی مقدمات بے نقاب کئے جبکہ دونوں ممالک کے درمیان منشیات کی سمگلنگ کے راستے بھی بند کر دیئے گئے۔
وزارت نے بتایا کہ چین، امریکہ اور متحدہ عرب امارات کی پولیس نے دبئی میں ٹیلی کام اور آن لائن فراڈ میں ملوث گروہوں کے خلاف مشترکہ کارروائی کرتے ہوئے 276 مشتبہ افراد کو گرفتار کیا اور ان جرائم کے پیچھے موجود منظم نیٹ ورکس کو بھی توڑا۔
چین اور امریکہ نے مفرور ملزمان کی حوالگی کے شعبے میں بھی تعاون کیا۔ امریکی حکام نے دو مطلوب ملزمان چین کے حوالے کئے جن میں ایک پر منشیات کی سمگلنگ اور غیر قانونی تجارت کا الزام تھا جبکہ دوسرے پر بیرون ملک چینی شہریوں کے اغوا اور قتل کا الزام ہے۔ دوسری جانب چینی پولیس نے بھی سنگین اور پرتشدد جرائم میں مطلوب ایک امریکی مفرور کو گرفتار کرکے امریکہ کے حوالے کیا۔
وزارت عوامی تحفظ نے کہا کہ چینی پولیس امریکہ اور دیگر ممالک کے قانون نافذ کرنے والے اداروں کے ساتھ عملی تعاون کو مزید فروغ دے گی، معلومات کے تبادلے اور مشترکہ تحقیقات کے نظام کو بہتر بنائے گی اور قانون کے مطابق سرحد پار جرائم کے خلاف بھرپور کارروائیاں جاری رکھے گی۔