تہران (شِنہوا) ایرانی میڈیا کے مطابق امریکہ نے رات بھر ایران کے مختلف علاقوں پر حملے کئے، جن میں ملک کے شمال مغربی حصے میں کم از کم ایک شخص جاں بحق جبکہ متعدد افراد زخمی ہو گئے۔
سرکاری خبر رساں ادارے ارنا کے مطابق مشرقی صوبے آذربائیجان کے بحران سے نمٹنے کے محکمے کے ڈائریکٹر جنرل مجید فرشی نے بتایا کہ پیر کی صبح تبریز کے جنوب مغرب میں ایک علاقے پر امریکہ کے دہشت گردانہ اور جارحانہ حملے میں ایک شخص شہید اور کئی زخمی ہوئے۔
ایران کے نیم سرکاری خبر رساں ادارے مہر کے مطابق جنوبی بندرگاہی شہر بوشہر کے کئی مقامات کو بھی نشانہ بنایا گیا۔ بوشہر میں ایران کا واحد عوامی جوہری بجلی گھر واقع ہے۔
مقامی میڈیا کے مطابق جنوب مغربی بندرگاہوں ماہ شہر اور بندر امام خمینی سمیت جنوبی بندرگاہی شہر سیریک میں بھی کئی دھماکوں کی اطلاعات موصول ہوئی ہیں جبکہ جنوب مشرقی بندرگاہ کونارک میں فضائی دفاعی نظام کو فعال کر دیا گیا ہے۔
ایران کے پریس ٹی وی کے مطابق امریکی فوج نے ایران کے شمال مغربی شہر تبریز کو بھی نشانہ بنایا ہے۔