بیجنگ (شِنہوا) چینی محققین نے حال ہی میں پیرووسکائٹ-آرگینک ٹینڈم شمسی سیل تیار کیا ہے جس نے مستحکم حالت میں فوٹو الیکٹرک توانائی کی تبدیلی کی کارکردگی کے حوالے سے 28.04 فیصد کے ساتھ نیا عالمی ریکارڈ قائم کیا ہے۔
سائنسی جریدے نیچر میں شائع ہونے والی ایک تحقیق میں بتایا گیا ہے کہ یہ شمسی سیل چائنیز اکیڈمی آف سائنسز (سی اے ایس) کے انسٹی ٹیوٹ آف کیمسٹری نے تیار کیا ہے۔ اس میں استعمال ہونے والا وسیع بینڈ گیپ پیرووسکائٹ بالائی ذیلی سیل اپنی نوعیت کے شمسی سیلز میں اب تک کا سب سے زیادہ اوپن سرکٹ وولٹیج حاصل کرنے میں کامیاب رہا ہے۔
جب اس بالائی ذیلی سیل کو انتہائی درستگی کے ساتھ ایک آرگینک نچلے ذیلی سیل کے ساتھ جوڑا گیا تو لیبارٹری میں اس ٹینڈم ڈیوائس کی توانائی کی تبدیلی کی زیادہ سے زیادہ کارکردگی 28.80 فیصد ریکارڈ کی گئی، جبکہ تصدیق شدہ مستحکم حالت کی کارکردگی 28.04 فیصد رہی۔ اس شمسی سیل نے بہترین عملی استحکام بھی دکھایا اور مسلسل 625 گھنٹے روشنی میں رہنے کے بعد بھی اپنی ابتدائی کارکردگی کا 90 فیصد برقرار رکھا۔
تحقیقی ٹیم کے سربراہ اور چائنیز اکیڈمی آف سائنسز کے رکن لی یونگ فانگ نے کہا کہ “یہ پیرووسکائٹ-آرگینک ٹینڈم شمسی سیل ہلکے وزن، میکانکی لچک اور اعلیٰ کارکردگی کا منفرد امتزاج پیش کرتا ہے۔”
لی نے کہا کہ “عمارتوں، نقل و حمل اور پہننے کے قابل الیکٹرانک آلات میں استعمال کے علاوہ طاقت اور وزن کے غیر معمولی تناسب کی بدولت یہ مصنوعی سیاروں اور خلائی اسٹیشنوں سمیت مستقبل کے خلائی مشنزکے لئے بھی ایک امید افزا انتخاب ثابت ہو سکتا ہے، جہاں ہلکے اور زیادہ موثر توانائی کے ذرائع انتہائی اہم ہوتے ہیں۔”
ابھرتی ہوئی فوٹو وولٹک ٹیکنالوجیز، خصوصاً پیرووسکائٹ اور آرگینک شمسی سیلز حالیہ برسوں میں تیزی سے ترقی کر رہی ہیں۔ پیرووسکائٹ-آرگینک ٹینڈم شمسی سیلز سورج کی روشنی سے زیادہ سے زیادہ توانائی حاصل کرنے کی صلاحیت رکھتے ہیں۔ ان میں پیرووسکائٹ کی بالائی تہہ مرئی روشنی کو جذب کرتی ہے، جبکہ آرگینک نچلی تہہ انفرا ریڈ روشنی کو جذب کرتی ہے، جس کے نتیجے میں ان کی نظریاتی کارکردگی روایتی سنگل جنکشن شمسی سیلز کے مقابلے میں کہیں زیادہ ہو سکتی ہے۔