نیروبی (شِنہوا) کینیا کے دارالحکومت نیروبی میں ’’سیئنگ چائنہ، ہوبے میڈیا ویک ان افریقہ 2026‘‘ کا افتتاح کیا گیا جس کا مقصد چین اور کینیا کے درمیان ثقافتی اور ذرائع ابلاغ کے شعبوں میں تعلقات کو مزید مضبوط بنانا ہے۔
تقریب میں شریک اعلیٰ سرکاری حکام، سفارت کاروں اور چین اور کینیا کے نشریاتی اداروں کے سربراہان نے اس بات پر زور دیا کہ دونوں ممالک کے درمیان میڈیا، فلم اور فنون کے شعبوں میں تعاون کو فروغ دیا جائے تاکہ ثقافتی ہم آہنگی اور باہمی دوستی مزید گہری ہو سکے۔
کینیا کی کمیونیکیشنز اتھارٹی (سی اے) کے ڈائریکٹر جنرل ڈیوڈ موگونئی نے کہا کہ چین اور کینیا دونوں اس بات پر یقین رکھتے ہیں کہ میڈیا اور ثقافت عوام کو ایک دوسرے کے قریب لانے کا موثر ذریعہ ہیں۔
ڈیوڈ موگونئی نے کہا کہ چین کا صوبہ ہوبے اپنی بھرپور ثقافتی وراثت اور ترقی یافتہ میڈیا صنعت کے لئے معروف ہے جبکہ کینیا ایک متحرک نشریاتی اور تخلیقی شعبہ رکھتا ہے، اس کی نوجوان آبادی ڈیجیٹل ٹیکنالوجی سے بخوبی آشنا ہے اور یہاں کہانی سنانے کی مضبوط روایت موجود ہے۔
ڈیوڈ موگونئی کا خطاب کمیونیکیشنز اتھارٹی میں کمیونیکیشنز اور سٹیک ہولڈر انگیجمنٹ کی نائب ڈائریکٹر جین کینیانجوئی نے پڑھ کر سنایا۔ جس میں ان کا کہنا تھا کہ “ان قوتوں کو یکجا کرنے سے ہمارے اداروں، ہمارے پیشہ ور افراد اور ہمارے ناظرین کے لئے قیمتی مواقع پیدا ہو سکتے ہیں۔”
ڈیوڈ موگونئی نے کینیا اور چین کے میڈیا اداروں پر زور دیا کہ وہ مشترکہ طور پر پروگراموں کی تیاری، اعلیٰ معیار کے آڈیو ویژول مواد کے تبادلے اور تکنیکی تعاون کو فروغ دیں تاکہ دونوں ممالک اپنے اپنے عوام تک ایک دوسرے کی کہانیاں موثر انداز میں پہنچا سکیں۔
کینیا میں چین کے سفارت خانے کے مشیر تانگ جیان جون نے کہا کہ یہ تقریب چین-افریقہ عوامی روابط کے سال کے فریم ورک کے تحت منعقد ہونے والا ایک اہم پروگرام ہے۔
تانگ نے کہا کہ یہ میڈیا ویک چین اور کینیا کے عوام کو ایک دوسرے کی ثقافت، ترقی اور معاشرت کے بارے میں مزید گہری آگاہی فراہم کرے گا۔