بیجنگ (شِنہوا) سیلابی موسم کے دوران شدید آفات کی صورت میں اگر زمینی مواصلاتی نیٹ ورک کے سگنلز دستیاب نہ ہوں تو چین کے دارالحکومت بیجنگ کے رہائشی ہنگامی رابطے اور امداد طلب کرنے کے لئے بیدو نیویگیشن سیٹلائٹ سسٹم (بی ڈی ایس) کی مختصر پیغام رسانی (ایس ایم ایس) سروس استعمال کر سکیں گے۔بدھ کے روز شائع ہونے والی بیجنگ ڈیلی کی ایک رپورٹ کے مطابق بیجنگ میں 3 بڑی ٹیلی کمیونیکیشن کمپنیوں چائنہ موبائل، چائنہ یونیکام اور چائنہ ٹیلی کام نے 15 جون کو مقامی رہائشیوں کے لئے یہ ہنگامی ایس ایم ایس مواصلاتی سروس مشترکہ طور پر شروع کی۔فی الحال 170 سے زائد سمارٹ فون ماڈلز ایس ایم ایس بھیجنے کی اس سہولت کو سپورٹ کرتے ہیں جبکہ پیغام وصول کرنے والے کے موبائل فون کے لئے کسی خاص قسم کے آلے کی ضرورت نہیں ہے۔یہ سروس صارفین کو درست جغرافیائی محل وقوع کے ساتھ پیغامات بھیجنے کی سہولت فراہم کرتی ہے جس سے حتیٰ کہ اس وقت بھی آفات کی بروقت اطلاع، خیریت دریافت کرنے اور ہنگامی امداد کی درخواست ممکن ہو جاتی ہے جب زمینی مواصلاتی نیٹ ورک مکمل طور پر بند ہو بشرطیکہ سمارٹ فون بیدو سیٹلائٹ میسیجنگ کی سہولت رکھتا ہو۔رہائشی عام ٹیکسٹ میسج کی طرح بیدو سیٹلائٹ ایس ایم ایس انٹرفیس کھول کر اپنا پیغام تحریر کر سکتے ہیں اور “سینڈ” بٹن دبا سکتے ہیں۔ اس کے بعد سمارٹ فون خودکار طور پر سیٹلائٹ تلاش کرنے کا عمل شروع کر دیتا ہے۔ سکرین پر دی گئی ہدایات پر عمل کرتے ہوئے اور فون کو جنوب مغربی آسمان میں موجود بیدو سیٹلائٹس کی سمت رکھنے سے صارف عموماً 5 سے 15 سیکنڈ کے اندر رابطہ قائم کرکے پیغام بھیج سکتا ہے۔ہر پیغام بیک وقت زیادہ سے زیادہ 4 وصول کنندگان کو بھیجا جا سکتا ہے اور اس کی زیادہ سے زیادہ حد 20 چینی حروف ہے۔ پیغام کا متن اور اس کے ساتھ منسلک مقام کی معلومات دونوں اسی حد میں شمار ہوتے ہیں۔