مظفرآباد(نیشنل ٹائمز) نجی کالج کے پرنسپل ارجمند گلزار المعروف حمزہ برہان کو قاتلانہ حملے میں شہید کر دیا گیا۔ پولیس نے ایک مبینہ قاتل کو گاڑی سمیت گرفتار کر لیا جبکہ دیگر دو ملزمان کی تلاش جاری ہے ۔

مقتول پرنسپل حمزہ برہان کو دو افراد نے فون کر کے کالج سے باہر بلایا، جہاں پہلے سے گھات لگائے بیٹھے تیسرے مسلح شخص نے انتہائی قریب سے ان کے سر میں گولیاں ماریں جس کے نتیجے میں وہ شدید زخمی ہو گئے ،انہیں ہسپتال منتقل کیا گیا جہاں وہ زخموں کی تاب نہ لاتے ہوئے چل بسے ۔ گرفتار قاتل کی شناخت عبداللہ کمال کے نام سے ہوئی ہے جس کا تعلق واہ کینٹ سے بتایا جا رہا ہے ۔ حمزہ برہان کا تعلق مقبوضہ جموں کشمیر کے ضلع پلوامہ سے تھا ، 2016 کے بعد ہجرت کر کے مظفرآباد آگئے تھے اور ان دنوں مظفرآباد میں ایک مقامی کالج میں بطور پرنسپل خدمات انجام دے رہے تھے ، حمزہ برہان کی نمازِ جنازہ راولپنڈی میں ادا کی گئی جس کے بعد انہیں سپردخاک کر دیا گیا ۔