بیجنگ (شِنہوا) یوم مئی کی تعطیلات کے دوران چینی سیاح دنیا بھر میں پھیل گئے جس سے افریقہ اور یورپ سے لے کر وسطی ایشیا تک بیرون ملک سفر کی طلب میں زبردست اضافہ ہوا۔ ہوٹلوں سے لے کر ٹور آپریٹرز تک تمام سیاحتی مقامات پر کاروبار میں خوش آئند تیزی دیکھی جا رہی ہے۔
قومی امیگریشن انتظامیہ نے 28 اپریل کو بتایا تھا کہ یوم مئی کی تعطیلات کے دوران روزانہ آنے اور جانے والے مسافروں کی اوسط تعداد 22 لاکھ 50 ہزار رہنے کی توقع ہے جبکہ ایک ہی دن میں یہ تعداد 24 لاکھ سے تجاوز کر سکتی ہے۔
ماہرین کا کہنا ہے کہ چینی سیاح اب تیزی سے بھرپور اور ہمہ گیر تجربات کی تلاش میں ہیں جس کی وجہ سے دنیا بھر کے سیاحتی مقامات اپنی سہولیات کو بڑھانے، خدمات کے معیار کو بلند کرنے اور نت نئے طریقے اپنانے پر مجبور ہیں جو عالمی سیاحتی صنعت میں نئی روح پھونک رہے ہیں۔
یکم مئی کو آسٹریلیا کے مشہور ترین مقامات میں سے ایک سڈنی اوپیرا ہاؤس کے سامنے چینی سیاحوں کی قطاریں لگی تھیں جو چینی زبان بولنے والے گائیڈز کی رہنمائی میں دورہ کرنا چاہتے تھے۔ چینی سیاح ہو نے شِنہوا کو بتایا کہ وہ تعطیلات کے دوران اپنے والدین اور دوست کے ساتھ آسٹریلیا کے 8 روزہ نجی دورے پر ہیں۔
کرغزستان میں جھیل اسیک- کل کے کنارے واقع قصبے چولپان- عطا میں ہوٹل کی مالکہ عزیزووا نے چینی سیاحوں کی تعداد میں نمایاں اضافہ محسوس کیا ہے۔ انہوں نے بتایا کہ یکم مئی کی رات دیر گئے 8 چینی سیاحوں کے ایک گروپ نے ہمارے گیسٹ ہاؤس میں چیک ان کیا۔ پچھلے سالوں میں بھی چینی مہمان آتے رہے ہیں لیکن اتنی بڑی تعداد میں کبھی نہیں آئے۔