ویب ڈیسک(نیشنل ٹائمز)امریکی بحریہ کا ایک جنگی جہاز منگل کے روز انڈو پیسیفک میں کئی گھنٹوں تک بجلی اور پروپلشن سے محروم رہا۔
امریکی بحریہ کے بیان کے مطابق گائیڈڈ میزائل ڈسٹرائر یو ایس ایس ہگنس کو اس کے برقی نظام میں خرابی کے باعث ’انجینئرنگ حادثہ‘ پیش آیا جس کے نتیجے میں جہاز مکمل طور پر بجلی سے محروم ہو گیا۔
بحریہ کے مطابق جہاز پر سوار تقریباً 300 اہلکار محفوظ رہے اور کوئی جانی نقصان نہیں ہوا۔
تاہم ایک دفاعی عہدیدار نے بتایا کہ بجلی اور پروپلشن کی یہ بندش کئی گھنٹوں تک جاری رہی جس دوران جہاز اپنی حرکت اور سمت پر کنٹرول کھو بیٹھا۔
ماہرین کے مطابق اس دوران جہاز کے ریڈار اور دفاعی نظام بھی بند رہے جس سے جہاز عملی طور پر بے بس اور غیر متحرک ہو گیا۔
سابق امریکی بحریہ کے کپتان کارل شوسٹر نے امریکی میڈیا کو بتایا کہ اس صورتحال میں ایمرجنسی ڈیزل جنریٹر صرف کمیونیکیشن اور ایئر کنڈیشننگ کو چلانے کے قابل ہوتے ہیں۔
بحریہ نے واقعے کی درست جگہ ظاہر نہیں کی تاہم انڈو پیسیفک کمانڈ کا دائرہ امریکی مغربی ساحل سے لے کر بھارت کی مغربی سرحد تک پھیلا ہوا ہے۔
یاد رہے کہ یو ایس ایس ہگنس ایک آرلی برک کلاس ڈسٹرائر ہے جو امریکی بحریہ کے سرفیس فلیٹ کی ریڑھ کی ہڈی سمجھے جاتے ہیں اور اس وقت ایسے 70 سے زائد جہاز سروس میں ہیں۔
