جکارتہ (شِنہوا) ” شی جن پھنگ: دی گورننس آف چائنہ“ کی پانچویں جلد کے انگریزی ایڈیشن کی تشہیری تقریب یہاں منعقد ہوئی۔
تقریب کے شرکاء نے کہا کہ یہ پانچویں جلد نئے دور کے لیے چینی خصوصیات کے حامل سوشلزم کے بارے میں شی جن پھنگ کے افکار کی ترقی میں تازہ ترین کامیابیوں کی عکاس ہےاور عالمی برادری کے لیے عصرِ حاضر کے چین کو سمجھنے کے حوالے سے ایک مستند ترین تصنیف کی حیثیت رکھتی ہے۔
شرکاء کا مزید کہنا تھا کہ چین نے اپنے 15ویں 5 سالہ منصوبے (2030-2026) کے تحت ایک نئے سفر کا آغاز کر دیا ہے جبکہ انڈونیشیا بھی اپنے ‘گولڈن انڈونیشیا 2045’ وژن کی جانب تیزی سے پیش قدمی کر رہا ہے۔ تزویراتی ہم آہنگی کو مضبوط بنا کر اور ترقیاتی تعاون کو وسعت دے کر دونوں ممالک نہ صرف اپنے عوام کو ٹھوس فوائد پہنچائیں گے بلکہ اس سے گلوبل ساؤتھ کی ترقی اور عالمی نظم ونسق کے نظام میں بہتری کے لیے بھی بھرپور تحریک ملے گی۔
انڈونیشیا کی عوامی مشاورتی اسمبلی کے چیئرمین احمد موزانی نے اپنے خطاب میں کہا کہ “شی جن پھنگ: دی گورننس آف چائنہ ” انڈونیشیا کے سفارتی، تعلیمی اور پالیسی ساز حلقوں کے لیے ایک قیمتی حوالہ فراہم کرتی ہے۔ انہوں نے مزید کہا کہ یہ تشہیری تقریب دونوں ممالک کے درمیان افکار اور نظریات کے تبادلے کو مزید گہرا کرنے کے لیے ایک اہم پلیٹ فارم ثابت ہوگی۔
انہوں نے امید ظاہر کی کہ انڈونیشیا کے مزید حکام، دانشور اور نوجوان اس اہم تصنیف کا مطالعہ کریں گے تاکہ وہ چین کی ترقی کے راستے اور نظم ونسق کے فلسفے کو بہتر طور پر سمجھ سکیں اور دنیا و بنی نوع انسان کی مستقبل کی ترقی کے حوالے سے اپنے نقطہ نظر کو وسعت دے سکیں۔
انڈونیشیا کے وزیر برائے ٹرانس مائیگریشن محمد افتتاح سلیمان سوریا ناگارا نے کہا کہ اپنے دورہ چین کے دوران میں نے خود دیکھا کہ کس طرح اس ملک نے عوام دوست ترقیاتی فلسفے کے ذریعے غربت کے خاتمے میں نمایاں پیش رفت کی ہے۔
انہوں نے مزید کہا کہ غربت میں کمی، دیہی ترقی اور علاقائی ہم آہنگی کے حوالے سے چین کے کلیدی تصورات اور اختراعی اقدامات، انڈونیشیا کے لیے آبادی کی منظم منتقلی کو فروغ دینے اور اپنے ملک کے مشرقی علاقوں میں ترقی کی رفتار کو تیز کرنے کے لیے ایک جامع اور قیمتی حوالہ فراہم کرتے ہیں۔
تقریب میں ماہرین اور دانشوروں نے چین کے 15ویں پانچ سالہ منصوبے کے تحت میسر مواقع، مشترکہ جدیدیت اور غربت کے خاتمے کے تجربات جیسے موضوعات پر تبادلہ خیال کیا۔
انڈونیشیا کے دیہی حکام کے لیے جاری ایک تربیتی پروگرام کے نمائندوں نے چین میں قیام اور وہاں ہونے والے تبادلوں کے اپنے تجربات شیئر کیے اور یہ بھی بتایا کہ انہوں نے چین سے سیکھے گئے اسباق کو اپنے دیہاتوں کے نظم و نسق میں کس طرح نافذ کیا ہے۔
اس تقریب کا اہتمام چین کے ریاستی کونسل اطلاعاتی دفتر، چائنہ انٹرنیشنل کمیونیکیشنز گروپ اور انڈونیشیا میں چینی سفارت خانے نے مشترکہ طور پر کیا تھا۔
تقریب میں چین اور انڈونیشیا کے تقریباً 200 شرکاء نے شرکت کی جن میں اشاعتی شعبے، تھنک ٹینکس اور میڈیا کے نمائندے شامل تھے۔