نوم پنہ (شِنہوا) کمبوڈیا کے ایک دانشور نے کہا ہے کہ کمبوڈیا اور چین کی دوستی نہ صرف دونوں ملکوں کے فائدے پر مبنی تعاون اور مشترکہ خوشحالی فراہم کرتی ہے بلکہ خطے میں سلامتی اور استحکام برقرار رکھنے میں بھی کردار ادا کر رہی ہے۔
کمبوڈیا کے رائل اکیڈمی کے تحت قائم تھنک ٹینک، انٹرنیشنل ریلیشنز انسٹی ٹیوٹ آف کمبوڈیا کے ڈائریکٹر جنرل کن فیا نے کہا کہ دونوں ممالک کی تزویراتی شراکت داری نہ صرف دیرپا ہے بلکہ مسلسل ترقی کر رہی ہے اور تبدیلی لا رہی ہے۔
انہوں نے شِنہوا کو بتایا کہ یہ تعلق اس بات کا واضح ثبوت ہے کہ باہمی فائدے پر مبنی تعاون صرف ایک نعرہ نہیں بلکہ مشترکہ خوشحالی کا راستہ ہے۔
انہوں نے کہا کہ حال ہی میں نوم پنہ میں چین اور کمبوڈیا کے درمیان وزرائے خارجہ اور دفاع کی سطح کا ہونے والا پہلا “2+2” تزویراتی مذاکراتی اجلاس گہری دوستی اور علاقائی سلامتی کے مشترکہ عزم کی عکاسی کرتا ہے۔
انہوں نے کہا کہ یہ کوئی معمول کی سفارتی ملاقات نہیں ہے بلکہ ہمارے تعلقات میں ایک بڑی بہتری ہے، جس میں سفارت کاری، دفاع اور عوامی سلامتی کے تعاون کو ایک منظم تزویراتی نظام سے منسلک کیا جا رہا ہے۔
انہوں نے مزید کہا کہ 68 سالہ سفارتی تعلقات کے بعد کمبوڈیا اور چین کی شراکت داری ایک نئے مرحلے میں داخل ہو گئی ہے جوزیادہ منظم، زیادہ جامع اور زیادہ سلامتی پر مرکوز ہے۔
یہ ترقی “ڈائمنڈ شش جہتی تعاون لائحہ عمل” پر مرکوز ہے جو چھ شعبوں یعنی سیاسی تعاون، پیداواری صلاحیت، زراعت، توانائی، سلامتی اور عوامی روابط پر مشتمل ہے۔
انہوں نے کہا کہ یہ صرف ایک لائحہ عمل نہیں بلکہ طویل المدتی تزویراتی ہم آہنگی کا نقشہ ہے جو چین کے بیلٹ اینڈ روڈ انیشی ایٹو کو کمبوڈیا کی پانچ سمتی حکمت عملی سے جوڑتا ہے۔
انہوں نے کہا کہ عالمی مسائل کے باوجود دونوں ممالک کے درمیان تجارتی حجم میں اضافہ ہوا ہے اور 2025 میں چین کمبوڈیا کا سب سے بڑا تجارتی شراکت دار رہا ہے۔
انہوں نے بتایا کہ کمبوڈیا اور چین کے آزاد تجارتی معاہدے نے ہزاروں اشیاء پر لگنے والے ٹیکس ختم کر دیئے ہیں جس سے کمبوڈیا کی زرعی مصنوعات جیسے چاول، کیلا، آم اور کالی مرچ کو چینی منڈی تک بڑی سطح پر رسائی ملی ہے۔
انہوں نے مزید کہا کہ چین کے ساتھ بنیادی شہری سہولتوں میں تعاون نے کمبوڈیا کے معاشی نقشے کو بدل دیا ہے۔