¹گوانگ ژو (شِنہوا) چین درآمدی و برآمدی میلہ، جسے عام طور پر کینٹن میلہ کہا جاتا ہے، میں نئے قائم ہونے والے ڈرون نمائشی زون میں چینی مینوفیکچررز اب صرف ہارڈ ویئر کی بات نہیں کر رہے۔
وہ ہنگامی امداد، عوامی تحفظ، صنعتی ڈرون کے بوجھ اور نظامی سطح کے حل پر بات کر رہے ہیں جو اس بات کی علامت ہے کہ چینی برآمد کنندگان انفرادی مصنوعات فروخت کرنے سے آگے بڑھ کر زیادہ مربوط حل فراہم کر رہے ہیں۔
یہ تبدیلی چین اور جرمنی کے درمیان انٹیلیجنٹ مینوفیکچرنگ میں تعاون کے لئے نئے مواقع پیدا کر رہی ہے کیونکہ جرمن خریدار اب صرف لاگت کے فائدے سے آگے دیکھتے ہوئے ایسے چینی شراکت دار تلاش کر رہے ہیں جو حسب ضرورت حل فراہم کریں، مصنوعات کی منصوبہ بندی میں مدد دیں اور طویل مدتی سپلائر تعلقات برقرار رکھ سکیں۔
کینٹن میلے کا 139واں ایڈیشن 15 اپریل کو چین کے جنوبی صوبے گوانگ ڈونگ کے شہر گوانگ ژو میں شروع ہوا۔ اس کے پہلے مرحلے جس کا موضوع “اعلیٰ درجے کی مینوفیکچرنگ” تھا، میں 216 ممالک اور خطوں سے تقریباً ایک لاکھ 67 ہزار غیر ملکی خریداروں نے شرکت کی جو پچھلے ایڈیشن کے پہلے مرحلے کے مقابلے میں 5.9 فیصد زائد ہے۔
جرمنی، جو یورپ میں چین کے اہم تجارتی شراکت داروں میں سے ایک ہے، طویل عرصے سے اس میلے میں مضبوط موجودگی رکھتا ہے۔