ہانگ کانگ (شِنہوا) ہانگ کانگ کی 8 یونیورسٹیوں نے ٹائمز ہائر ایجوکیشن ایشیا یونیورسٹی رینکنگ 2026 میں جگہ حاصل کر لی ہے جبکہ 2 بڑی مقامی یونیورسٹیوں نے خطے میں سرفہرست 10 جامعات میں اپنی جگہ برقرار رکھی ہے۔
یونیورسٹی آف ہانگ کانگ چھٹے نمبر پر جبکہ چائنیز یونیورسٹی آف ہانگ کانگ دسویں نمبر پر موجود ہے۔ اس اعلیٰ فہرست میں ہانگ کانگ یونیورسٹی آف سائنس اینڈ ٹیکنالوجی 12ویں، سٹی یونیورسٹی آف ہانگ کانگ 14ویں، ہانگ کانگ پولی ٹیکنک یونیورسٹی 18ویں اور ہانگ کانگ باپٹسٹ یونیورسٹی 40ویں نمبر ہے۔ ایجوکیشن یونیورسٹی آف ہانگ کانگ (ای ڈی یوایچ کے) اور لنگ نان یونیورسٹی نے پہلی بار 100 اعلیٰ جامعات میں اپنی جگہ بناکر نئی پیشرف کی اور بالترتیب 37ویں اور 84 ویں نمبر پر آئیں۔
ہانگ کانگ خصوصی انتظامی علاقے (ایچ کے ایس اے آر) کی حکومت کی سیکرٹری تعلیم کرسٹین چھوئی نے سوشل میڈیا پوسٹ میں لکھا کہ یہ بہترین کارکردگی حکومت کی مسلسل مالی معاونت اور تعلیمی معیار بہتر بنانے کے لئے کئے گئے اقدامات کا نتیجہ ہے۔
انہوں نے کہا کہ محکمہ تعلیم مقامی جامعات کے ساتھ مل کر کام جاری رکھے گا تاکہ ہانگ کانگ کو اعلیٰ تعلیم اور عالمی قابلیت کے مرکز کے طور پر مزید مضبوط بنایا جا سکے۔
ایجوکیشن یونیورسٹی ہانگ کانگ کے صدر جان لی چھی-کن نے یونیورسٹی کی اس درجہ بندی میں پہلی بار شمولیت کو ایک اہم سنگ میل قرار دیا اور اسے موثر تحقیق اور ایک متحرک عالمی تعلیمی ماحول کی عکاسی قرار دیا۔
ٹائمز ہائر ایجوکیشن ایشیا یونیورسٹی رینکنگ 18 مختلف معیارات پر جامعات کا جائزہ لیتی ہے، جن میں تدریس، تحقیقی ماحول، تحقیق کا معیار، بین الاقوامی معیار اور صنعتی روابط شامل ہیں۔