بیجنگ (شِنہوا) چین نے یورپی یونین کے سائبر سکیورٹی ایکٹ کے ترمیمی مسودے کے بارے میں اپنی آراء باضابطہ طور پر یورپی کمیشن کو جمع کرا دی ہیں جن میں اپنے سرکاری موقف اور سنگین خدشات کا اظہار کیا گیا ہے۔
چین کی وزارت تجارت کے ترجمان حہ یونگ چھیان نے ایک معمول کی پریس کانفرنس کے دوران بتایا کہ یورپی یونین کو چین کی جانب سے پیش کردہ آراء اور مجوزہ ترامیم کو بہت اہمیت دینی چاہیے اور ان پر سنجیدگی سے غور کرنا چاہیے۔
حہ نے کہا کہ اگر چینی کمپنیوں کو اس کے نتیجے میں کسی امتیازی سلوک کا سامنا کرنا پڑا تو چین اپنے بیرونی تجارتی قانون اور صنعتی و سپلائی چین سکیورٹی سے متعلق ریاستی کونسل کے ضوابط کے مطابق چینی اداروں کے جائز حقوق اور مفادات کے تحفظ کے لئے اقدامات کر سکتا ہے۔
ترجمان نے اس بات کا اعادہ بھی کیا کہ تعاون اور بات چیت ہی چین اور یورپی یونین کے مسائل حل کرنے کا درست راستہ ہے۔ چین مشاورت کے ذریعے یورپی یونین کے ساتھ اختلافات کو مناسب طریقے سے حل کرنے اور عالمی صنعتی و سپلائی چینز کے استحکام اور ہموار کام کو برقرار رکھنے کے لئے مل کر کام کرنے کو تیار ہے۔