تہران (نیشنل ٹائمز) ایران کے صدر مسعود پزشکیان نے کہا ہے کہ ایران ہمیشہ سے بات چیت اور معاہدوں کا خیرمقدم کرتا آیا ہے اور آئندہ بھی مذاکرات کے عمل کو خوش آمدید کہتا رہے گا۔

اپنے بیان میں صدر مسعود پزشکیان نے زور دیا کہ حقیقی اور نتیجہ خیز مذاکرات کے لیے اعتماد کی فضا ضروری ہے، تاہم وعدہ خلافیاں، ناکہ بندیاں اور دھمکیاں اس عمل میں بڑی رکاوٹ ہیں۔

انہوں نے کہا کہ عالمی برادری فریقین کے بیانات اور دعوؤں میں موجود تضاد کو بخوبی دیکھ رہی ہے، جس سے مذاکراتی عمل متاثر ہو سکتا ہے۔

ایرانی صدر نے اس عزم کا اعادہ کیا کہ ایران خطے اور دنیا میں استحکام کے لیے تعمیری مکالمے اور سفارتی کوششوں کو جاری رکھے گا، بشرطیکہ اس میں سنجیدگی اور باہمی احترام کو یقینی بنایا جائے۔