بیجنگ (شِنہوا) چین نے کہا ہے کہ تائیوان کے علیحدگی پسند ذہنیت رکھنے والے رہنما لائی چھنگ تے کو ایسواتینی کے مجوزہ دورے کے لئے کئی ممالک کی جانب سے پرواز کی اجازت دینے سے انکار ایک چین کے اصول کے لئے وسیع بین الاقوامی حمایت کی عکاسی کرتا ہے۔
ریاستی کونسل کے امور تائیوان دفتر کی ترجمان ژانگ ہان نے ایک پریس بریفنگ کے دوران ان خیالات کا اظہار اس وقت کیا جب ان سے لائی کے دورے کی منسوخی پر تبصرہ کرنے کو کہا گیا کیونکہ مجوزہ روٹ کے ساتھ موجود ممالک نے فضائی حدود کے استعمال کی اجازت دینے سے انکار کر دیا۔
ژانگ نے کہا کہ ہم ایک چین کے اصول کو برقرار رکھنے کے حوالے سے متعلقہ ممالک کے موقف اور اقدامات کی تعریف کرتے ہیں۔
انہوں نے مزید کہا کہ اس عمل نے ایک بار پھر ثابت کر دیا ہے کہ ایک چین کا اصول بین الاقوامی تعلقات کو چلانے والا ایک بنیادی ضابطہ اور عالمی برادری کا غالب اتفاق رائے ہے۔
بدھ کے روز ہی چینی وزارت خارجہ کے ایک ترجمان نے کہا کہ ایسواتینی کے سوا تمام افریقی ممالک نے چین کے ساتھ سفارتی تعلقات استوار کر رکھے ہیں۔