شی آن (شِنہوا) چینی ماہرین آثار قدیمہ نے چین کے شمال مغربی صوبے شانشی میں چوتھی صدی عیسوی سے تعلق رکھنے والا ایک وسیع و عریض مقبرہ دریافت کیا ہے۔
شانشی اکیڈمی آف آرکیالوجی کے مطابق یہ قبر ممکنہ طور پر 16 ریاستوں کے دور (304-439) کی ایک شاہی قبر ہے۔جو کہ لٹنے کے باوجود اپنی مکمل ترتیب اور ساخت برقرار رکھے ہوئے ہے۔ کھدائی کے دوران اس قبر سے صرف 17 نوادرات برآمد ہوئے، جن میں ایک چینی مٹی کا برتن بھی شامل ہے جس پر چائے کی دھول جیسی چمکدار گلیز لگی ہوئی ہے، جو اسی دور کی دوسری قبروں میں بہت کم ملتا ہے۔
اکیڈمی کے ایسوسی ایٹ محقق اور کھدائی کی ٹیم کے سربراہ یو چھون لی نے بتایا کہ مقبرے میں دریافت ہونے والے مٹی کے تین تعمیراتی ڈھانچوں میں سے سامنے والے چیمبر کی چھت پر لکڑی کے طرز کی اہرام نما چھت ہے جس کی چوٹی ہموار ہے۔ اس کے مرکز میں 9 خانوں پر مشتمل ایک نقش شدہ جالی نما چھت ہے جو کہ 16 ریاستوں کی آثار قدیمہ میں اپنی نوعیت کی پہلی مثال ہے اور تحقیق کے لحاظ سے انتہائی اہمیت کی حامل ہے۔
جالی نما چھت روایتی چینی سجاوٹی چھتوں کا ایک نمونہ ہے جو چین کےشمالی علاقوں میں دریائے زرد کے مغربی علاقوں کے بہت سے غاروں اور مندروں کی چھتوں پر پایا جاتا ہے۔ یو چھون لی کے مطابق یہ پہلا موقع ہے کہ ایسا ڈیزائن کسی مقبرے کے اندر دریافت ہوا ہےجو کہ 16 ریاستوں کے دور کے ثقافتی ملاپ کی عکاسی کرتا ہے۔
یہ مقبرہ شمال سے جنوب تک 85 میٹر طویل ہے۔ ماہرین آثار قدیمہ نے شانشی کے شہر شیان یانگ کے ضلع وی چھنگ میں 3 دیگر مقبرے اور مٹی کے برتن بنانے والی ایک بھٹی بھی دریافت کی ہے۔