راولپنڈی(نیشنل ٹائمز) پاکستان اور مصر کے درمیان مشترکہ انسداد دہشتگردی مشق تھنڈر-II کا آغاز ہو گیا ہے ۔پاک فوج کے شعبہ تعلقات عامہ (آئی ایس پی آر )کے مطابق دو ہفتوں پر محیط یہ مشق سپیشل آپریشنز سکول چیراٹ میں ہو رہی ہے جس میں پاک فوج کے سپیشل سروسز گروپ اور مصری فوج کی سپیشل فورسز کے دستے حصہ لے رہے ہیں۔ افتتاحی تقریب میں کمانڈنٹ سپیشل آپریشنز سکول چیراٹ نے بطور مہمانِ خصوصی شرکت کی۔آئی ایس پی آر کے مطابق اس مشترکہ مشق کا مقصد پیشہ وارانہ مہارتوں میں اضافہ، انسداد دہشتگردی آپریشنز میں باہمی تعاون کو فروغ دینا اور دونوں دوست ممالک کے درمیان دیرینہ فوجی تعلقات کو مزید مستحکم کرنا ہے ۔مشق کے دوران شریک دستے ایک دوسرے کے تجربات اور مہارتوں سے استفادہ کریں گے ، خصوصا انسداد دہشتگردی کارروائیوں کے حوالے سے جدید طریقہ کار اور حکمت عملیوں کا تبادلہ کیا جائے گا۔