تل ابیب(نیشنل ٹائمز)اسرائیلی وزیر دفاع اسرائیل کاٹز نے دھمکی دی ہے کہ اگر ایران نے امریکی و اسرائیلی حملوں کا جواب دیا تو اسے بھاری قیمت چکانا پڑے گی۔ویڈیو پیغام جاری کرتے ہوئے اسرائیل کاٹز نے کہا ہے کہ اگر ایران نے امریکی و اسرائیلی حملوں کے جواب میں اسرائیل پر اپنے حملے جاری رکھے تو ایرانی قیادت کا تعاقب اور انہیں ہلاک کرنے کا سلسلہ جاری رہے گا اور اسی کے ساتھ ساتھ اہم ایرانی تنصیبات کو نشانہ بنایا جاتا رہے گا۔انہوں نے کہا جب تک میزائل داغے جاتے رہیں گے اور اسرائیلی شہریوں کو نشانہ بنایا جاتا رہے گا، ایران کو بھاری قیمت چکانا پڑے گی جس کے نتیجے میں اس کے قومی انفراسٹرکچر اور نظام کی عملی صلاحیتیں مفلوج ہو جائیں گی۔اسرائیلی وزیر دفاع کا مزید کہنا تھا کہ ہم ایرانی قیادت کا تعاقب اور اسے غیر مؤثر بنانے کے ساتھ ساتھ ایران بھر میں سکیورٹی اہداف اور سٹریٹجک وسائل پر بھی حملے جاری رکھیں گے۔خیال رہے کہ 28 فروری سے شروع ہونے والے امریکی و اسرائیلی حملوں کے نتیجے میں ایران میں متعدد سیاسی اور عسکری رہنما شہید ہو چکے ہیں، جن میں رہبرِ اعلیٰ آیت اللہ علی خامنہ ای بھی شامل ہیں، ان حملوں میں ایران کے صنعتی تنصیبات، پلوں اور شہری مقامات کو بھی نشانہ بنایا گیا ہے۔