بیجنگ (شِنہوا) چین میں چھنگ منگ تہوار کی تعطیلات کے دوران جمعہ سے منگل تک ریلوے کے ذریعے تقریباً 9 کروڑ 5 لاکھ مسافر دوروں کا امکان ہے۔
چائنہ اسٹیٹ ریلوے گروپ کمپنی لمیٹڈ نے 5 روزہ سفری رش کے دوران روزانہ اوسطاً ایک کروڑ 81 لاکھ سفری دوروں کی توقع ظاہر کی ہے جبکہ ہفتہ کے روز سفر عروج پر پہنچنے اور ایک ہی دن میں 2 کروڑ 12 لاکھ سفری دوروں کا امکان ہے۔
ریلوے حکام کے مطابق اس سال چھنگ منگ تعطیلات کے دوران رشتہ داروں سے ملاقاتوں، آباؤ اجداد کی قبروں پر حاضری، بہار کی سیر و تفریح اور سیاحت کے لئے مسافروں کی طلب میں زبردست اضافہ دیکھا جا رہا ہے۔ مسافروں کے اس بہاؤ میں زیادہ تر درمیانے اور مختصر فاصلے کے سفر شامل ہیں جبکہ سیاحت سے متعلقہ سفر میں بھی نمایاں اضافہ ہوا ہے۔
چھنگ منگ تہوار اس سال 5 اپریل کو منایا جا رہا ہے۔ یہ چین کا ایک روایتی تہوار ہے جس میں لوگ اپنے مرحومین کو خراج عقیدت پیش کرتے ہیں اور آباؤ اجداد کو یاد کرتے ہیں۔ یہ تعطیلات لوگوں کو گھروں سے باہر کی سرگرمیوں اور سیر و سیاحت کے لئے ایک مختصر وقفہ بھی فراہم کرتی ہیں۔