بیجنگ (شِنہوا) چین کی وزارت صنعت و انفارمیشن ٹیکنالوجی (ایم آئی آئی ٹی) کے ایک عہدیدار نے خلائی کمپیوٹنگ صنعت کو منظم انداز میں ترقی دینے کے لئے ٹھوس کوششوں کی ضرورت پر زور دیا ہے۔
ایم آئی آئی ٹی کے شعبہ اطلاعات و مواصلات کی ترقی کے نائب ڈائریکٹر ژاؤ سی نے بیجنگ میں ایک صنعتی کانفرنس کے دوران کہا کہ خلائی کمپیوٹنگ میں مدار میں بروقت ڈیٹا پراسیسنگ، کم لاگت توانائی اور وسیع رقبے تک رسائی جیسے فوائد موجود ہیں۔
ژاؤ سی نے بتایا کہ حالیہ برسوں میں چین نے خلائی کمپیوٹنگ نیٹ ورکس کی آزمائشی تعمیر اور توثیق کا عمل بتدریج آگے بڑھایا ہے، تکنیکی کامیابیاں حاصل کی ہیں اور متعدد سیٹلائٹ منصوبوں کو فروغ دیا ہے۔
ژاؤ سی نے مزید کہا کہ خلائی کمپیوٹنگ کی ترقی کے لئے رہنمائی فراہم کرنے والی پالیسیوں کی منصوبہ بندی، مقامی حالات کے مطابق اہل علاقوں کی حوصلہ افزائی اور سیٹلائٹ کے لئے تابکاری سے محفوظ چپس اور سیٹلائٹس کے درمیان لیزر مواصلات جیسی ٹیکنالوجیز اور مصنوعات کی تحقیق و ترقی کو فروغ دینے کی ضرورت ہے۔
ژاؤ سی نے ریموٹ سینسنگ، مواصلاتی بہتری، کم بلندی کی معیشت کے لئے مدار میں ڈیٹا پراسیسنگ اور ہنگامی مواصلات جیسے شعبوں میں خلائی کمپیوٹنگ کے استعمال کو بھی فروغ دینے کی حوصلہ افزائی کی۔