بیجنگ (شِنہوا) چین میں شعبہ صحت کے حکام نے کہا ہے کہ چین نے ٹاؤن شپ ہیلتھ سنٹرز اور کمیونٹی کلینکس میں روایتی چینی طب (ٹی سی ایم) کی خدمات کو وسعت دینے اور انہیں معیاری بنانے کے لئے رہنما اصول جاری کئے ہیں۔
یہ رہنما اصول قومی انتظامیہ برائے روایتی چینی طب، قومی صحت کمیشن اور بیماریوں پر قابو پانے اور روک تھام کی انتظامیہ نے مشترکہ طور پر جاری کئے ہیں، جن کا مقصد بنیادی صحت کی خدمات کو بہتر بنانا اور نچلی سطح پر ٹی سی ایم خدمات کی اعلیٰ معیار کی ترقی کو فروغ دینا ہے۔
دستاویز کے مطابق بنیادی سطح کے اداروں کے لئے لازم ہے کہ وہ کم از کم ٹی سی ایم علاج کی 6 اقسام اور 10 اقسام کی تکنیکیں فراہم کریں، جن میں آکوپنکچر، حرارتی تھراپی، حجامہ اور مساج شامل ہیں۔
ان اداروں کو کم از کم 80 اقسام کی چینی پیٹنٹ ادویات اور 300 سے کم نہ ہونے والی جڑی بوٹیوں کے نسخہ جاتی اجزاء بھی فراہم کرنا ہوں گے۔
رہنما اصولوں میں ہائی بلڈ پریشر، ذیابیطس اور پھیپھڑوں کی دائمی بیماری جیسے امراض کے انتظام میں ٹی سی ایم کے وسیع تر استعمال پر زور دیا گیا ہے اور اس کے ساتھ روک تھام، علاج اور بحالی پر مشتمل خدمات کو مربوط بنانے کی ہدایت دی گئی ہے۔
ان میں یہ شرط بھی رکھی گئی ہے کہ ان اداروں میں کام کرنے والے ڈاکٹروں میں ٹی سی ایم معالجین کا تناسب کم از کم 20 فیصد ہونا چاہیے۔