بیجنگ (شِنہوا) ایک چینی عہدیدار نے کہا ہے کہ چین کے مشرقی صوبے فوجیان کے شہر فوژو میں ہونے والی 9 ویں ڈیجیٹل چین سربراہ کانفرنس 29 اور 30 اپریل کو ہو گی، جس میں کامیابیوں کو اجاگر کرنے، جدید ترین ٹیکنالوجیز کے اجرا اور ایک کامیاب ڈیجیٹل ماحول کی تشکیل پر زیادہ زور دیا جائے گا۔
چین کی قومی ڈیٹا انتظامیہ (این ڈی اے) کے سربراہ لیو لیہونگ نے یہ بات ریاستی کونسل کے دفتر اطلاعات میں پریس کانفرنس کے دوران کہی۔ انہوں نے مزید کہا کہ اس کانفرنس کا موضوع ڈیجیٹل ٹیکنالوجیز میں اختراع و ترقی کو تیز کرنا اور ڈیجیٹل چین کی تعمیر کو گہرا کرنا ہے۔
انہوں نے کہا کہ یہ کانفرنس ڈیجیٹل چین کی ترقی میں حاصل کی گئی اہم کامیابیوں اور اہم پیش رفت کو اجاگر کرے گی۔ اہم اشاعتوں میں ڈیجیٹل چین ترقیاتی رپورٹ (2025) اور ڈیجیٹل چین ترقیاتی انڈیکس شامل ہوں گے۔
سرکاری اداروں کی جانب سے ڈیجیٹل چین سے متعلق 30 سے زیادہ اہم پالیسیوں، رپورٹس اور معیارات کا اجرا کیا جائے گا، جن میں قومی ڈیٹا انتظامیہ (این ڈی اے)، چین کی سائبر سپیس انتظامیہ (سی اے سی) اور وزارت صنعت و اطلاعاتی ٹیکنالوجی (ایم آئی آئی ٹی) شامل ہیں۔
تقریباً 400 نمایاں ادارے، جن میں چائنہ سدرن پاور گرڈ اور علی بابا شامل ہیں، ڈیجیٹل تبدیلی میں اپنی جدید ترین ٹیکنالوجیز اور مصنوعات پیش کریں گے۔