ہانگ ژو (شِنہوا) امریکی کانٹینٹ رائٹر لوسیان جارج نے چین میں ہسپتال کے اپنے تجربات پر مبنی ایک ویڈیو سوشل میڈیا پر شیئر کی جو تیزی سے وائرل ہوگئی۔ اس ویڈیو کو 70 ہزار سے زیادہ لائکس ملے اور اس پر بھرپور بحث چھڑ گئی۔
جارج نے بتایا کہ بغیر کسی بیمہ کے ڈاکٹر سے معائنے کی فیس صرف 4 امریکی ڈالر تھی جبکہ امریکہ میں اس کے لئے کم از کم 300 ڈالر ادا کرنے پڑتے۔ انہوں نے مزید کہا کہ چین کی بڑی آبادی کے باوجود اس کا صحت کا نظام جس قدر موثر ہے، اس سے میں بہت متاثر ہوں۔
انہوں نے چین کے مشرقی صوبے ژےجیانگ میں ژےجیانگ یونیورسٹی سکول آف میڈیسن سے منسلک دوسرے ہسپتال میں اپنا جسمانی معائنہ کروایا جسے انہوں نے “ناقابل یقین” قرار دیا۔ انہوں نے محض ڈھائی گھنٹے میں 9 مختلف ٹیسٹ مکمل کئے۔ تمام ٹیسٹ مختلف کلینکس میں ہوئے اور سارا عمل انتہائی ہموار رہا۔ ٹیسٹ کے نتائج براہ راست ان کے فون پر موصول ہوئے جس میں کسی بھی طبی مسئلے کی صورت میں فوری الرٹ کی سہولت بھی موجود تھی۔
جارج ان بہت سے غیر ملکی مریضوں میں شامل ہیں جو چین کے صحت کے موثر نظام کی کارکردگی سے متاثر ہوئے ہیں۔ بہت سے افراد نے اپنے اسی طرح کے تجربات آن لائن شیئر کئے ہیں، جس سے ملک کی تیزی سے ڈیجیٹل، موثر اور لاگت و وقت کی بچت فراہم کرنے والی طبی خدمات کی جانب عالمی توجہ مزید بڑھ گئی ہے۔ یہ موبائل ادائیگی، تیز رفتار ریلوے اور ہوٹل ڈیلیوری روبوٹس کے بعد چین میں ایک نیا “ضرور آزمانے والا” تجربہ بن گیا ہے۔
متعدد ہسپتالوں کے حکام نے شِنہوا کو بتایا کہ اگرچہ غیر ملکی مریض اب بھی مجموعی مریضوں کا ایک چھوٹا حصہ ہیں تاہم ان کی تعداد مسلسل بڑھ رہی ہے۔ نرم ویزا پالیسیوں نے بھی اس اضافے میں کردار ادا کیا ہے کیونکہ کچھ مسافر چین کے دورے میں ہنگامی طبی علاج بھی حاصل کرتے ہیں۔