واشنگٹن (شِنہوا) امریکی صدر ڈونلڈ ٹرمپ نے سپین کو دھمکی دی ہے کہ اگر اس نے امریکہ کو ایران پر حملوں کے لئے اپنے اڈے استعمال کرنے کی اجازت نہ دی تو وہ سپین کے ساتھ تمام تجارتی تعلقات منقطع کر دیں گے جبکہ انہوں نے برطانیہ سے بھی اپنی ناپسندیدگی ظاہر کی۔
ٹرمپ نے جرمن چانسلر فریڈرش میرس کے ساتھ اوول آفس میں ملاقات کے آغاز پر صحافیوں سے کہا کہ ہم سپین کے ساتھ تمام تجارتی تعلقات منقطع کرنے جا رہے ہیں۔ ہم سپین سے کسی قسم کا تعلق نہیں چاہتے۔
ٹرمپ نے مزید کہا کہ ویسے میں برطانیہ سے بھی خوش نہیں ہوں۔ ہم جس سے نمٹ رہے ہیں وہ ونسٹن چرچل نہیں ہے۔
برطانوی وزیراعظم کیئر سٹارمر نے پیر کو پارلیمنٹ میں کہا تھا کہ برطانیہ امریکہ اور اسرائیل کے ایران پر حملوں میں شامل نہیں ہو رہا۔
جرمن چانسلر فریڈرش میرس نے منگل کے روز اوول آفس میں ٹرمپ سے کہا کہ جرمنی امید کرتا ہے کہ امریکہ اور اسرائیلل کی ایران کے خلاف جاری جنگ جلد ختم ہو جائے گی۔
میرس پہلے غیر ملکی رہنما ہیں جنہوں نے امریکہ اور اسرائیل کی جانب سے ایران کے خلاف بڑے پیمانے پر فوجی مہم کے آغاز کے بعد ٹرمپ سے ذاتی طور پر ملاقات کی۔