لاہور (نیشنل ٹائمز)سیکرٹریٹ کے قریب واقع وزارت منصوبہ بندی و ترقی، پی اینڈ ڈی کی عمارت میں اچانک آگ بھڑک اٹھی، جس نے دیکھتے ہی دیکھتے شدت اختیار کر لی۔ریسکیو اہلکار شیشے توڑتے ہوئے اندر داخل ہوئے اور آگ کوبجھانے کی کوشش کی تاہم آگ عمارت کے اندرونی حصوں میں پھیلتی گئی۔ جبکہ ریسکیو 1122 کی 8 سے 12 گاڑیاں موقع پر پہنچ کر آگ پر قابو پانے کی کوششوں میں مصروف رہیں۔ چیئرمین پی اینڈ ڈی ڈاکٹر نعیم رؤف کا کہنا تھا کہ عمارت میں اتوار کی وجہ سے کوئی عملہ موجود نہیں تھا، خوش قسمتی سے کوئی جانی نقصان نہیں ہوا۔ سینئر صوبائی وزیر مریم اورنگزیب نے بیان میں کہا کہ پہلی منزل پر ویلڈنگ کے دوران آگ بھڑکی۔ریسکیو حکام کے مطابق تین گھنٹے کی مسلسل جدوجہد کے بعد آگ پر قابو پا لیا گیا، جبکہ کولنگ کا عمل جاری ہے ۔ حادثے میں کوئی جانی نقصان نہیں ہوا، تاہم مالی نقصان کا تخمینہ اور اہم سرکاری فائلوں یا سسٹم کو پہنچنے والے نقصان کی تفصیلات تاحال سامنے نہیں آ سکیں۔ آگ لگنے کی حتمی وجوہات اور نقصان کی نوعیت کا تعین انکوائری رپورٹ کے بعد ہی ممکن ہو سکے گا۔