اسلام آباد(نیشنل ٹائمز)مجلس شوریٰ (پارلیمنٹ) کا مشترکہ اجلاس (آج)2مارچ بروز پیر صبح ساڑھے دس بجے پارلیمنٹ ہاؤس میں منعقد ہو گا جس سے صدر مملکت آصف علی زرداری خطاب کریں گے ،اجلاس میں ایران کے سپریم لیڈر کی شہادت اور پاک افغان کشیدگی سمیت اہم امور زیر بحث آئیں گے ،متعدد نجی بلز منظوری کے لیے پیش کئے جائیں گے ۔ مشترکہ اجلاس کے موقع پر قومی اسمبلی سیکرٹریٹ کی جانب سکیورٹی کے سخت انتظامات کئے گئے ہیں ،پارلیمنٹ ہاؤس کے احاطے میں غیر متعلقہ افراد کا داخلہ ممنوع ہو گا، پارلیمنٹ ہاؤس کی راہداریوں میں کسی کو بھی ویڈیو بنانے کی اجازت نہیں ہو گی۔ڈائریکٹوریٹ جنرل آف میڈیا قومی اسمبلی سیکرٹریٹ کی جانب سے جاری اعلامیہ کے مطابق مشترکہ اجلاس کی کوریج کرنے والے صحافی حضرات کیلئے قومی اسمبلی اور سینیٹ کے 2026 کیلئے جاری کیے گئے نئے کارڈ ویلڈ ہونگے ۔سینیٹ سیکرٹریٹ نے اجلاس کا مکمل ایجنڈا جاری کر دیا ۔ اجلاس میں تعلیمی اداروں کے قیام، سرکاری ملازمتوں، معاشی مسائل اور قواعد میں ترمیم سمیت متعدد اہم بلز اور موشنز پیش کیے جائیں گے ۔