ابوظہبی (نیشنل ٹائمز) ابوظبی ائیرپورٹ انتظامیہ نے تصدیق کی ہے کہ شیخ زاید ہوائی اڈے پر ڈرون حملے کے نتیجے میں ایک شخص ہلاک اور سات افراد زخمی ہوئے ہیں۔
انتظامیہ کے مطابق واقعے کے فوری بعد ہنگامی ٹیمیں طلب کی گئیں اور زخمیوں کو فوری طبی امداد فراہم کی گئی۔ متعلقہ اداروں کے تعاون سے صورتحال پر قابو پا لیا گیا۔
ادھر دبئی میڈیا آفس نے بھی دبئی ائیرپورٹ پر حملے کی تصدیق کی ہے۔ میڈیا آفس کے مطابق دبئی ائیرپورٹ پر میزائل حملے میں چار افراد زخمی ہوئے۔
اماراتی حکام نے ایک بیان میں کہا کہ ایران کے 132 میزائلوں کو تباہ کیا گیا، جبکہ 209 میں سے 195 ڈرونز مار گرائے گئے۔ باقی 14 ڈرونز کے گرنے سے محدود نقصان ہوا۔
دبئی میڈیا آفس کے مطابق ڈرون کو تباہ کرتے وقت برج العرب کے بیرونی حصے میں آگ لگی، تاہم عمارت میں آگ پر قابو پا لیا گیا اور کوئی جانی نقصان نہیں ہوا۔
عرب میڈیا نے رپورٹ کیا کہ دبئی مرینا اور دبئی ہلز میں بھی دھماکوں کی آوازیں سنی گئیں۔
کچھ دیر قبل اماراتی وزارت داخلہ نے میزائل حملے کے پیش نظر نیا الرٹ جاری کیا اور رہائشیوں کے موبائل فونز پر ہدایات بھیجی گئیں کہ وہ فوری طور پر شیلٹر میں چلے جائیں۔