اسلام آباد (نیشنل ٹائمز) وزیراعظم شہباز شریف نے سعودی ولی عہد شہزادہ محمد بن سلمان سے ٹیلیفونک گفتگو کرتے ہوئے ایران پر اسرائیلی حملے سے پیدا ہونے والی علاقائی کشیدگی اور بعض خلیجی ممالک پر حملوں کی شدید مذمت کی ہے۔
اعلامیے کے مطابق وزیراعظم محمد شہباز شریف نے آج شام محمد بن سلمان سے ٹیلی فون پر گفتگو کی۔ انہوں نے اسرائیل کی جانب سے ایران پر حملے کے نتیجے میں پیدا ہونے والی سنگین صورتحال پر تشویش کا اظہار کرتے ہوئے بعد ازاں بعض خلیجی ممالک پر ہونے والے حملوں کی بھی سخت الفاظ میں مذمت کی۔
وزیراعظم کا کہنا تھا کہ ایسے اقدامات خطے کے امن و استحکام کے لیے انتہائی خطرناک ہیں اور صورتحال کو مزید خراب کر سکتے ہیں۔ انہوں نے موجودہ حالات میں سعودی قیادت کے ساتھ پاکستان کی مکمل یکجہتی اور بھرپور حمایت کا یقین دلایا اور کہا کہ پاکستان ہر حال میں اپنے سعودی بھائیوں اور بہنوں کے ساتھ کھڑا رہے گا۔
انہوں نے اس عزم کا اعادہ کیا کہ پاکستان، سعودی عرب کی خودمختاری، سلامتی اور علاقائی سالمیت کے تحفظ کے لیے اپنی غیر متزلزل حمایت جاری رکھے گا۔ وزیراعظم نے مزید کہا کہ پاکستان اس نازک مرحلے پر تعمیری اور مثبت کردار ادا کرنے کے لیے تیار ہے۔ انہوں نے دعا کی کہ ماہِ مقدس رمضان المبارک کی برکتوں سے خطے میں جلد امن اور استحکام قائم ہو۔
دوسری جانب وزیراعظم شہباز شریف نے محمد بن زاید النہیان، صدر متحدہ عرب امارات، کو بھی ٹیلی فون کیا اور یکجہتی کا اظہار کیا۔ انہوں نے کہا کہ پاکستان ان مشکل حالات میں اپنے اماراتی بھائیوں اور بہنوں کے ساتھ کھڑا رہے گا اور دونوں ممالک کے درمیان مضبوط برادرانہ تعلقات ہر آزمائش پر پورے اتریں گے۔
وزیراعظم نے ابوظبی میں ایک پاکستانی شہری کی المناک موت پر گہرے دکھ اور افسوس کا اظہار بھی کیا۔
