آکلینڈ (شِنہوا) نیوزی لینڈ کے شہر آکلینڈ بھر میں چینی برادری نے متعدد رنگا رنگ ثقافتی تقریبات کا انعقاد کرکے چین کا نیا سال منایا، جن میں گھوڑے کے سال کے تہواری جذبے کو اجاگر کیا گیا اور نیوزی لینڈ کے کثیر الثقافتی معاشرے میں چینی ثقافت کے متعلق بڑھتی ہوئی دلچسپی کی عکاسی کی گئی۔
تقریبات میں نیوزی لینڈ میں نئے چینی قمری سال کا چھٹا آن لائن گالا اور تاکا پونا بیچ پر بڑے پیمانے کےساحلی میلے کا انعقاد بھی شامل تھا، جس میں کمیونٹی گروپس، فنکاروں اور مختلف نسلی پس منظر سے تعلق رکھنے والے افراد نے شرکت کی۔
آن لائن گالا کا انعقاد چینی ثقافتی ایسوسی ایشن نیوزی لینڈ اور پیسیفک کلچرل اینڈ آرٹس ڈیویلپمنٹ ایسوسی ایشن نے مشترکہ طور پر کیا تھا، جسے متعدد ڈیجیٹل پلیٹ فارمز کے ذریعے دنیا بھر میں نشر کیا گیا، اس میں نیوزی لینڈ، چین اور آسٹریلیا کے فنکاروں نے شرکت کی۔ چار گھنٹے پر محیط پروگرام میں موسیقی، رقص، سازوں کی دھنیں، مزاح اور ملٹی میڈیا مظاہرے شامل تھے، جن کے ذریعے روایتی ورثے اور جدید تخلیقی صلاحیت دونوں کی عکاسی کی گئی۔
ہفتے کے اختتام پر‘‘ہیپی چائنیز نیو ایئر‘‘ میلے نے آکلینڈ کی معروف تاکا پونا بیچ کو ایک شاندار تہواری مقام میں تبدیل کردیا جو ثقافتی مظاہروں، روایتی دستکاریوں اور چینی کھانوں سے بھرپور تھا، ہزاروں افراد نے وہاں جمع ہو کر جشن منایا۔