میکسیکو سٹی (شِنہوا) میکسیکو کے وزیر برائے سکیورٹی اور شہری تحفظ عمر گارسیا ہارفوچ نے کہا ہے کہ جالیسکو نیو جنریشن کارٹل کے انتقامی حملوں میں 27 سکیورٹی اہلکار ہلاک ہو گئے ہیں۔
میکسیکو کے حکام نے قانون نافذ کرنے والے اداروں کو نشانہ بنانے والے مجموعی طور پر 27 حملے ریکارڈ کئے ہیں۔ ان میں سے 6 بڑے حملے مغربی ریاست جالیسکو میں ہوئے جن میں نیشنل گارڈ کے 25 ارکان، جیل کا ایک گارڈ اور اسٹیٹ اٹارنی جنرل کے دفتر کا ایک ملازم ہلاک ہوا۔
ہارفوچ نے ایک پریس کانفرنس میں بتایا کہ ان حملوں میں منظم جرائم پیشہ گروہوں کے 30 ارکان بھی مارے گئے۔
میکسیکو کے فوجی دستوں نے اتوار کو ایک آپریشن میں جالیسکو نیو جنریشن کارٹل کے سربراہ نمیسیو اوسی گویرا کاروانتیس المعروف ایل مینچو کو ہلاک کر دیا تھا۔ اس کے ردعمل میں کارٹل کے ارکان نے گاڑیوں اور تجارتی مراکز کو آگ لگا دی اور شاہراہیں بلاک کر دیں۔ صورتحال کے پیش نظر کچھ ریاستوں میں سکول بھی بند رکھے گئے۔
انہوں نے مزید کہا کہ حکومت نے جالیسکو میں اضافی سکیورٹی فورسز روانہ کر دی ہیں اور صورتحال سے نمٹنے کے لئے ایک قومی کمانڈ سنٹر قائم کر دیا گیا ہے۔
میکسیکو کی صدر کلاڈیا شین بام نے قومی سلامتی اور امن کی بحالی کے لئے اپنی انتظامیہ کے عزم کا اعادہ کیا ہے۔