نان چھانگ (شِنہوا) جیسے ہی چینی عوام گھوڑے کے سال کا جشن منا رہے ہیں، روایتی ثقافت کی مقبولیت میں نمایاں اضافہ دیکھا گیا ہے اور مختلف ثقافتی ورثے کے عناصر رفتار، طاقت اور کامیابی کی علامت سمجھے جانے والے گھوڑے کے ساتھ ہم آہنگ ہو کر اس جشن میں شامل ہو گئے ہیں۔
نئے چینی سال کی 15 فروری سے شروع ہونے والی تعطیلات 23 فروری تک جاری رہیں گی۔ سیاح مشہور مقامات، مندروں کے میلے اور دیہی اجتماعات کا رخ کرتے ہیں، وہ روایتی دستکاری اور ثقافتی ورثے کی چیزوں کو جشن کے موقع پر پا رہے ہیں۔
چین کے مٹی کے برتنوں کے لئے مشہور شہر جنگ دے ژین میں ہتھیلی کے برابر مٹی سے بنے گھوڑوں کی مانگ نے دستکاروں کو تعطیلات کے دوران بھی مصروف رکھا۔ اس چھوٹے تحفے کو “گھومتا ہوا گھوڑا” کہا جاتا ہے اور یہ خریداروں کے لئے اچھی قسمت لانے والا سمجھا جاتا ہے۔
جنگ دے ژین میں مٹی کے برتنوں کی دکان کی مالکن جیانگ ہوان شی نے کہا کہ انہوں نے ہر ماہ مٹی کے تقریباً 600 گھوڑے بیچے ہیں۔ یہ گھوڑے اے آئی کی مدد سے ماڈلنگ اور تھری ڈی پرنٹنگ کے ذریعے ڈیزائن کئے گئے اور تندور میں پکانے کے صدیوں پرانے عمل سے تیار کئے گئے۔
انہوں نے کہا کہ جدید ٹیکنالوجیز اور قدیم تکنیکوں کے امتزاج نے ہمیں صارفین کی ضروریات کو تیزی سے سمجھنے میں مدد دی اور ہمارے مستقبل کے نئے تخلیقی منصوبوں کے لئے راہ ہموار کی۔
چین میں گھوڑا روایتی طور پر وفاداری، توانائی اور جدت پسندی کی روح کی علامت ہے اور برج کے سب سے مقبول جانوروں میں شمار کیا جاتا ہے۔ جنگ دے ژین میں خوش بختی کے گھوڑے کے ڈیزائن والے چائے کے سیٹ بھی بہت مقبول ہوگئے ہیں۔
ثقافتی مصنوعات کی مقبولیت صرف مٹی کے برتن اور خوش قسمتی کی علامت تک محدود نہیں۔ چینی ای-کامرس پلیٹ فارمز پر گھوڑے کے موضوع پر مبنی ثقافتی مصنوعات جیسے کاغذ کاٹنا، لکڑی کی کندہ کاری اور کشیدہ کاری اب بھی خریداروں کو اپنی طرف متوجہ کر رہی ہیں۔
لان ژو یونیورسٹی کے سکول آف جرنلزم اینڈ کمیونیکیشن کے ڈین لیو شیاؤ چھینگ نے کہا کہ گھوڑے کا سال روایتی ثقافتی ورثے کو فروغ دینے کے لئے ایک اہم محرک رہا ہے کیونکہ گھوڑا لگاتار ترقی اور آگے بڑھنے کی روح کی نمائندگی کرتا ہے۔