کراچی (نیشنل ٹائمز)بحیرہ عرب میں پاکستان نیوی ، میری ٹائم سکیورٹی ایجنسی ، جوائنٹ میری ٹائم انفارمیشن کوآرڈی نیشن سینٹر اور اینٹی نارکوٹکس فورس سندھ نے مشترکہ طور پر ایک اہم بین الادارہ جاتی کارروائی کا مظاہرہ کیا۔
انٹیلی جنس معلومات کی بنیاد پر ایک بے ریاست (Stateless) کشتی کو روک کر اس پر سوار ہو کر تلاشی لی گئی۔ تفصیلی تلاش کے دوران کشتی سے 1300 کلوگرام سے زائد چرس اور بڑی مقدار میں غیر قانونی شراب برآمد ہوئی، جو غیر قانونی ترسیل کے لیے لے جائی جا رہی تھی۔اس کامیاب کارروائی کو بروقت انٹیلی جنس شیئرنگ، حقیقی وقت میں مؤثر رابطہ کاری اور شریک اداروں کی مربوط حکمت عملی نے ممکن بنایا۔ ضبط شدہ منشیات و دیگر اشیا کی مجموعی اسٹریٹ مالیت 20 ارب پاکستانی روپے سے زائد بتائی جاتی ہے ، جو خطے میں سرگرم منشیات اور اسمگلنگ نیٹ ورکس کے لیے ایک بڑا دھچکا ہے ۔ ضبط شدہ سامان مزید تحقیقات اور قانونی کارروائی کے لیے باضابطہ طور پر اینٹی نارکوٹکس فورس (سندھ) کے حوالے کر دیا گیا۔ یہ کارروائی پاکستان کے سمندری اور قانون نافذ کرنے والے اداروں کے درمیان مضبوط ہم آہنگی کو اجاگر کرتی ہے اور اسمگلنگ کے خلاف مشترکہ عزم، قومی سمندری حدود کے تحفظ اور علاقائی سلامتی کے فروغ کی توثیق کرتی ہے ۔