لاہور(نیشنل ٹائمز)بالائی علاقوں میں برفباری کا نیا سپیل شروع ہوگیا، آسمان سے سفید گالوں کی برسات ہوتی رہی، ہر شے برف میں ڈھک گئی۔
وادی نیلم میں برفباری کا 5 سال کا ریکارڈ ٹوٹ گیا، بالائی نیلم میں 6 فٹ سے زائد برفباری ریکارڈ کی گئی جس سے ہر چیز برف میں چھپ گئی۔ملکہ کوہسار مری اور گلیات میں سنو فال سے سیاح لطف اندوز ہوتے، مری میں برفباری کے باعث مال روڈ، جھیکا گلی اور نتھیا گلی سیاحوں کیلئے بند کر دی گئی، صرف بکنگ والوں کو اجازت ہے، اس کے علاوہ کوئٹہ، قلات، مستونگ، کان مہتر زئی، مسلم باغ، چمن میں برفباری ہوئی، وادی نیلم، باغ، سدھن گلی، گنگا چوٹی، نیزہ گلی، تولی پیر میں بھی سفید چادر بچھ گئی۔برفباری کے باعث متعدد رابطہ شاہراہیں بلاک ہوگئیں، گریس ویلی اور شونٹر ویلی کی سڑک بھی بند ہوگئی، نانگا پربت اور بابوسر ٹاپ پر 10 فٹ سے زیادہ برف پڑ چکی، جس کے باعت معمولات زندگی بری طرح متاثر ہوگئے، لوگ گھروں میں محصور ہو کر رہ گئے، باغ میں برفانی تودہ گرنے سے ایک شہری چل بسا، گاڑی کو نقصان پہنچا، لیپہ اور نیلم ویلی میں لینڈ سلائیڈنگ سے 13 گھر مکمل تباہ ہوگئے، 28 جزوی متاثر ہوئے۔برفباری سے بند وادی لیپہ شاہراہ بحال کر دی گئی، گلیات میں چار روز گزرنے کے باوجود بیشتر علاقوں میں بجلی معطل ہوگئی، رابطہ سڑکوں کی بھی مکمل بحالی نہ ہو سکی۔سڑکوں کی بندش کے باعث خوراک اور ادویات کی شدید قلت پیدا ہوگئی، ناران، کاغان، کالام اور چترال میں سڑکیں بند ہونے کا خدشہ پیدا ہوگیا، مالم جبہ میں برفباری نے سیاحوں کو اپنی اور کھینچ لیا۔لاہور سمیت پنجاب کے مختلف علاقوں میں بادل برس پڑے، ٹھنڈ کی شدت مزید بڑھ گئی، بالائی علاقوں میں برفباری سے درجہ حرارت نقطہ انجماد سے گر گیا، لہہ میں منفی 12، زیارت میں پارا منفی 8 ریکارڈ کیا گیا، استور، گوپس، پارا چنار میں درجہ حرارت منفی 7 تک گر گیا۔مالم جبہ، قلات، راولا کوٹ میں پارا منفی 5 ریکارڈ کیا گیا، کراچی میں کم سے کم درجہ حرارت 11، لاہور میں 7 ریکارڈ کیا گیا۔
ممکنہ لینڈسلائیڈنگ کا الرٹ جاری
دوسری جانب خیبرپختونخوا، گلگت بلتستان، آزاد کشمیر اور بلوچستان کے پہاڑی علاقوں میں ممکنہ لینڈسلائیڈنگ بارے پیشگی الرٹ کر دیا گیا۔
این ڈی ایم اے کے مطابق دیر، سوات، کالام، چترال، کوہستان، شانگلہ، ایبٹ آباد اور مانسہرہ میں لینڈسلائیڈنگ کا شدید خطرہ ہے، مری، گلیات، استور، ہنزہ، باغ، مظفرآباد اور گردونواح کے پہاڑی علاقوں میں بھی لینڈ سلائیڈنگ کا خدشہ ہے، اس کے علاوہ کوئٹہ، زیارت، قلعہ عبداللہ، نوشکی، قلات، مستونگ، پنجگور اور خضدار میں بھی لینڈسلائیڈنگ متوقع ہے۔این ڈی ایم اے نے عوام کو برفباری اور بارش کے دوران غیرضروری سفر سے گریز کی ہدایت کی ہے۔