بھلوال(نیشنل ٹائمز)بھلوال کے قریب میلووال سے دھوری روڑ پر ٹرک الٹنے سے چار افراد جاں بحق جبکہ 8افراد زخمی ہوگئے۔
بتایا گیا ہے کہ ٹرک جس پر توڑی لدی ہوئی تھی پر بارہ افراد سوار تھے، میلووال سے دھوری روڑ پر پٹرول پمپ کے قریب تیز رفتاری سے الٹ گیا جس کے نتیجہ میں چار افراد موقع پر دم توڑ گئے جبکہ آٹھ افراد زخمی ہوئے۔حادثہ میں جاں بحق افراد کی شناخت 25سالہ محمد عدیل،22سالہ محمد علی 18سالہ محمد علی اور 20سالہ محمد امجد کے نام سے ہوئی ہے، زخمیوں میں 20سالہ محمد سلیمان 19سالہ عامر، 18سالہ محمد اکبر 25سالہ محمد نعمان،22سالہ محمد رمضان 27سالہ تصور عباس ،27سالہ عنایت اور 21سالہ محمد نزاکت شامل ہیں۔حادثے کی اطلاع پر پولیس کے اعلیٰ حکام بھاری نفری سمیت موقع پر پہنچ گئے، جاں بحق ہونے والے افراد کی لاشوں اور زخمیوں کو فوری طور پر ہسپتال منتقل کر دیا گیا، جن میں سے چار افراد کی حالت تشویشناک بتائی گئی ہے۔پولیس حکام نے بتایا کہ تیز رفتار کے باعث ہونے والے حادثے میں قیمتی جانیں ضائع ہوئیں، واقعہ کی تحقیقات شروع کر دی گئی ہے۔