نیویارک (نیشنل ٹائمز)اقوام متحدہ میں پاکستانی مستقل مندوب عاصم افتخار نے کہا ہے کہ عالمی قوانین کے تحت مسئلہ فلسطین اور مسئلہ کشمیر کا حل ضروری ہے۔
اقوام متحدہ میں تنازعات سے بچاؤ اور ان کے حل پر مباحثہ سے خطاب میں پاکستانی مندوب عاصم افتخار نے کہا یہ بدقسمتی ہے کہ آج تک مسئلہ فلسطین اور مسئلہ کشمیر کا حل نہیں نکالا جاسکا، انہوں نے خطاب کے دوران تنازعات کا سیاسی اور سفارتی حل نکالنے کا مطالبہ کیا۔انہوں نے کہا کہ پاکستان یو این چارٹر کے مطابق تمام تنازعات کا حل چاہتا ہے، تنازعات کا حل اقوام متحدہ کے چارٹر کا بھی امتحان ہے، سکیورٹی کونسل کے فیصلے کے برعکس تنازعات برقرارہیں۔عاصم افتخار کا کہنا تھا کہ تنازعات کو روکنے کیلئے چارٹر میں تبدیلی نہیں عمل کی ضرورت ہے، تنازعات کے حل کیلئے تنازعات کو سمجھنے کی بھی ضرورت ہے۔خیال رہے کہ گزشتہ روز بھی پاکستانی مندوب نے سلامتی کونسل کے ایران کی صورت حال پر ہنگامی اجلاس سے خطاب کے دوران کہا تھا کہ تمام تنازعات کے پرامن حل پریقین رکھتے ہیں، تمام تنازعات عالمی قانون کے مطابق حل ہونے چاہئیں۔