جدہ (نیشنل ٹائمز) مسجد نبوی میں 25 برس تک اذان دینے کی سعادت حاصل کرنے والے خوش الحان مؤذن شیخ فیصل نعمان انتقال فرما گئے جس کے بعد ان کی کہی ہوئی آخری اذان سوشل میڈیا پر وائرل ہوگئی۔شیخ فیصل نعمان کو سنہ 2001ء میں باضابطہ طور پر مسجدِ نبوی کا مؤذن مقرر کیا گیا تھا، انتظامیہ کے مطابق شیخ فیصل نعمان کا انتقال 23 دسمبر کو ہوا، انہیں نمازِ فجر کے بعد مدینہ منورہ کے تاریخی جنت البقیع قبرستان میں سپردِ خاک کر دیا گیا، مسجد انتظامیہ کی جانب سے مؤدن کی آخری اذان کی ویڈیو بھی شیئر کی گئی۔اذان دینا شیخ فیصل نعمان کیلئے محض ایک ذمہ داری نہیں بلکہ خاندانی وراثت تھی، ان کے دادا اور والد دونوں مسجد نبوی میں مؤذن کی حیثیت سے خدمات انجام دیتے رہے ہیں، ان کے والد کم عمری میں ہی اس عظیم منصب پر فائز ہوئے اور 90 برس سے زائد عمر تک مسجد نبوی میں اذان دیتے رہے بعد ازاں یہ سعادت شیخ فیصل نعمان کو نصیب ہوئی۔شیخ فیصل نعمان کی نماز جنازہ فجر میں ادا کی گئی اور تدفین مدینہ منورہ کے تاریخی جنت البقیع میں کی گئی، جنت البقیع وہ مقدس اور پُر نور قبرستان ہے جہاں رسول اللہ ﷺ کے اہل خانہ اور جلیل القدر صحابہ کرامؓ آرام فرما ہیں۔