ڈھاکا(نیشنل ٹائمز) بنگلادیش نیشنلسٹ پارٹی (بی این پی) کی چیئر پرسن اور سابق وزیرِاعظم بیگم خالدہ ضیاء کی طبیعت بگڑنے پر انہیں ڈھاکا کے ہسپتال میں داخل کروا دیا گیا۔
غیر ملکی خبر ایجنسی نے خالدہ ضیاء کی میڈیکل ٹیم کے رکن اور ذاتی معالج پروفیسر اے زیڈ ایم زاہد حسین کے حوالے سے بتایا کہ ہسپتال داخلے کا فیصلہ خالدہ ضیاء کے علاج کیلئے تشکیل شدہ میڈیکل بورڈ کی سفارش پر کیا گیا ہے۔ذاتی معالج پروفیسر اے زیڈ ایم زاہد حسین کا کہنا ہے کہ خالدہ ضیاء کو میڈیکل بورڈ کے مشورے پر کئی اہم ٹیسٹوں کیلئے ہسپتال میں داخل کیا گیا ہے، ٹیسٹ رپورٹس کا جائزہ لینے کے بعد بورڈ اگلے اقدامات کا فیصلہ کرے گا۔خیال رہے کہ 79 سالہ سابق بنگلا دیشی وزیرِ اعظم کو اس سے قبل بھی 15 اکتوبر کو ہسپتال لایا گیا تھا، بنگلادیشی میڈیا کے مطابق خالدہ ضیاء گزشتہ کئی برسوں سے متعدد پیچیدہ بیماریوں کا شکار ہیں جن میں آرتھرائٹس، ذیابیطس، گردوں کے مسائل، پھیپھڑوں کی تکالیف اور آنکھوں کے امراض شامل ہیں۔