ریاض(نیشنل ٹائمز)سعودی عرب میں بارش کے لئے نماز استسقاء ادا کی گئی۔
سعودی پریس ایجنسی کے مطابق سعودی عرب کے تمام علاقوں میں گزشتہ روز استسقاء کی نمازیں ادا کی گئیں تاکہ اللہ سے بارش کی درخواست کی جا سکے۔مقامی میڈیا رپورٹ کے مطابق یہ نمازیں سنت نبوی (صلی اللہ علیہ وسلم) کے مطابق خشک سالی اور بارش کے دیر سے آنے کے دوران ادا کی گئیں تاکہ اللہ کی مہربانی اور کرم سے پورے ملک میں بارش ہو سکے۔رپورٹس میں بتایا گیا ہے کہ خادم حرمین شریفین شاہ سلمان بن عبدالعزیز آل سعود کی ہدایت پر لوگ مختلف شہروں، صوبوں، مراکز اور گاؤں میں واقع مساجد اور استسقاء کے لئے مخصوص مقامات پر جا کر اس روحانی تقریب میں شریک ہوئے۔اس کے علاوہ مفتی اعظم نے بھی ملک بھر کے عوام کو بارش کے لئے نماز استسقاء پڑھنے کی اپیل کی تھی۔اسلام میں نماز استسقاء دو رکعات پر مشتمل ایک خاص نماز ہے جس میں لوگ اللہ سے معافی مانگتے ہیں اور بارش کی دعا کرتے ہیں، یہ نماز عموماً خطبہ کے ساتھ ادا کی جاتی ہے، جس میں امام عوام کو اللہ سے معافی طلب کرنے اور بارش کے لئے دعا کرنے کی اہمیت پر زور دیتے ہیں۔سعودی عرب کے علاوہ مشرق وسطیٰ میں خشک سالی اور ریکارڈ سطح کی کم بارشوں کے بڑھتے ہوئے بحران کے بعد شام اور قطر جیسے عرب ممالک نے عوام کو استسقاء کی نماز ادا کرنے کی دعوت دی ہے۔شام میں وزارت اوقاف کی ہدایت پر استسقاء کی نماز آج پورے ملک میں ادا کی جائے گی، وزارت نے لوگوں سے کہا ہے کہ نماز سے پہلے تین دن روزہ رکھیں، ضائع شدہ حقوق کی واپسی کریں اور اجتماعی توبہ و مغفرت کے ساتھ نماز میں شرکت کریں۔قطر نیوز ایجنسی کے مطابق قطر کے امیر تمیم بن حمد آل ثانی کی اپیل پر لوگوں نے گزشتہ روز استسقاء کی نماز ادا کی، امیر قطر نے اس نماز کی قیادت کرتے ہوئے ہزاروں عبادت گزاروں کے ساتھ دوحہ کی لوسیل مسجد میں شرکت کی۔