راولپنڈی (نیشنل ٹائمز) پارکس اینڈ ہارٹیکلچر اتھارٹی (پی ایچ اے) راولپنڈی کے زیرِ اہتمام اور اولیو فاؤنڈیشن کے تعاون سے دسویں نیشنل زیتون فیسٹیول 2025 2 اور 3 نومبر کو علامہ اقبال پارک، مری روڈ، راولپنڈی میں منعقد ہوگا۔ یہ فیسٹیول پاکستان کے زیتون انقلاب کا جشن منانے کے ساتھ ساتھ زیتون کی کاشت، ویلیو ایڈیشن، ایگروبزنس مواقع اور پائیدار زراعت کے فروغ کے لیے ایک نمایاں قومی پلیٹ فارم کے طور پر منظم کیا جا رہا ہے۔
اس سال کا فیسٹیول اپنی دسویں سالگرہ کے موقع پر ان کاشتکاروں، محققین اور کاروباری شخصیات کو خراجِ تحسین پیش کرے گا جنہوں نے پاکستان کو زیتون کے شعبے میں خودکفالت کی راہ پر گامزن کرنے میں کلیدی کردار ادا کیا۔ دو روزہ فیسٹیول میں زیتون اور دیگر زرعی مصنوعات کی نمائش، کاشتکاروں کے لیے آگاہی سیشنز اور تکنیکی مظاہرے، پروسیسرز اور ایگرو انٹرپرینیورز کے اسٹالز، فوڈ کورٹ، خاندانی تفریحی سرگرمیاں، زیتون آئل چکھنے کے مقابلے اور ثقافتی پروگرام شامل ہوں گے۔
تقریب میں وزارتِ قومی غذائی تحفظ و تحقیق، پاکستان ایگریکلچرل ریسرچ کونسل (PARC)، صوبائی محکمہ جاتِ زراعت، نجی شعبے کے نمائندگان، کاشتکاروں، طلباء اور عام شہریوں کی بڑی تعداد شرکت کرے گی۔
ڈی جی پی ایچ اے راولپنڈی احمد حسن رانجھا نے کہا کہ نیشنل زیتون فیسٹیول پاکستان کی پائیدار زراعت کی صلاحیت کی علامت بن چکا ہے۔ ان کے مطابق، پی ایچ اے کا مقصد باہمی تعاون کے ذریعے دیہی ترقی، خواتین کی بااختیاری اور نوجوانوں کی شمولیت کو فروغ دینا ہے تاکہ ملک کا زرعی مستقبل مزید مضبوط بنایا جا سکے۔
پی ایچ اے راولپنڈی نے عوام، طلباء اور زراعت سے دلچسپی رکھنے والے تمام افراد کو دعوت دی ہے کہ وہ اس منفرد فیسٹیول میں شرکت کر کے پاکستان کے ابھرتے ہوئے زیتون کلچر کا حصہ بنیں۔