اسلام آباد(نیشنل ٹائمز)اسلام آباد ہائیکورٹ میں بانی پاکستان تحریک انصاف (پی ٹی آئی) عمران خان کا ایکس (سابق ٹوئٹر) اکاؤنٹ بند کرنے سے متعلق درخواست 4 نومبر کو سماعت کے لیے مقرر کر دی گئی۔
رجسٹرار آفس کی جانب سے جاری کردہ کاز لسٹ کے مطابق عمران خان کا ایکس (سابق ٹوئٹر) اکاؤنٹ بند کرنے سے متعلق کیس پر سماعت جسٹس ارباب محمد طاہر کریں گے۔عدالت نے بانی پی ٹی آئی کو نوٹس جاری کرتے ہوئے جواب طلب کر رکھا ہے، اس کے ساتھ ہی عدالت نے نیشنل سائبر کرائم ایجنسی، سپرنٹنڈنٹ جیل اور دیگر فریقین سے بھی جواب طلب کیا ہے۔درخواست میں مؤقف اختیار کیا گیا ہے کہ دورانِ قید بانی پی ٹی آئی کے ایکس اکاؤنٹ سے مبینہ طور پر انتشاری اور اشتعال انگیز مواد پوسٹ کیا جا رہا ہے جسے فوری طور پر ہٹایا جائے اور اکاؤنٹ کو بلاک کیا جائے۔درخواست گزار نے عدالت سے استدعا کی ہے کہ بانی پی ٹی آئی کے غیر قانونی اور بدنیتی پر مبنی ٹوئٹس کو ہٹایا جائے اور انہیں مزید پھیلنے سے روکا جائے تاکہ عوامی امن اور ریاستی اداروں کے خلاف منفی پروپیگنڈے کو روکا جا سکے۔