اسلام آباد(نیشنل ٹائمز) اسلام آباد ہائیکورٹ نے بانی پاکستان تحریکِ انصاف عمران خان سے جیل ملاقاتوں کے آرڈر پر عملدرآمد کا حکم دے دیا، فہرست کے مطابق ملاقات کروائی جائے۔
عدالت نے سپرنٹنڈنٹ اڈیالہ جیل کو ہدایت کی ہے کہ وہ ملاقاتوں کے حوالے سے عدالتی فیصلے پر فوری عمل یقینی بنائیں، اسلام آباد ہائیکورٹ کا یہ حکم چیف جسٹس سرفراز ڈوگر، جسٹس ارباب طاہر اور جسٹس اعظم خان پر مشتمل 3 رکنی بنچ نے جاری کیا۔لارجر بنچ نے واضح کیا کہ بانی پی ٹی آئی سے ملاقاتیں سکیورٹی پالیسی آرڈرز کے مطابق کرائی جائیں گی، عدالت نے اپنے حکم میں 24 مارچ کے عدالتی فیصلے کا حوالہ دیتے ہوئے سپرنٹنڈنٹ اڈیالہ جیل کو ہدایت کی کہ ملاقاتوں کے لیے جاری شدہ اجازت ناموں اور طریقہ کار پر عملدرآمد یقینی بنایا جائے۔مزید برآں عدالت نے آئندہ بھی ملاقاتوں کے لیے اجازت دینے کی ہدایت کرتے ہوئے کہا کہ تمام اقدامات قانون اور سکیورٹی ضوابط کے مطابق کیے جائیں، عدالت نے یہ بھی کہا کہ سلمان اکرم راجا جو فہرست دیں گے، ان کی ملاقات کروائی جائے۔واضح رہے کہ آج وزیراعلیٰ خیبرپختونخوا محمد سہیل آفریدی بھی عدالت میں موجود تھے، جب سماعت ختم ہوئی تو وہ اڈیالہ جیل کے لیے روانہ ہوگئے۔