پشاور(نیشنل ٹائمز) خیبر پختونخوا کے نومنتخب وزیراعلیٰ سہیل آفریدی نے کہا ہے کہ جو لوگ عمران خان سے ملاقات کرنے نہیں دے رہے انہیں احساس کرنا چاہیے کہ میں وزیراعلیٰ ہوں۔
ہائی کورٹ آمد کے موقع پر گفتگو کرتے ہوئے وزیراعلیٰ کے پی کے سہیل آفریدی نے کہا ہے کہ میں بانی پی ٹی آئی عمران خان سے ملاقات کے لیے جا رہا ہوں، کوشش ہوگی کہ ان سے ملاقات ہو جائے۔انہوں نے کہا ہے کہ کروڑوں عوام کی نمائندگی کرتا ہوں، جو لوگ ملاقات کرنے نہیں دے رہے انہیں احساس کرنا چاہیے کہ میں وزیراعلیٰ ہوں، کابینہ کی جو فہرست جاری کی گئی ہے وہ جعلی ہے، بانی سے مشاورت کے بعد کابینہ کو فائنل کریں گے۔قبل ازیں وزیراعلیٰ سہیل آفریدی پشاور ہائی کورٹ پہنچے جہاں انہوں نے حفاظتی ضمانت کے لیے درخواست دائر کی جس پر جسٹس اعجاز انور اور جسٹس نعیم انور پر مشتمل 2 رکنی بنچ نے سماعت کی۔عدالت نے وزیراعلیٰ سہیل آفریدی کو حفاظتی ضمانت دیتے ہوئے پولیس کو مقدمات میں گرفتار نہ کرنے کا حکم دیا، جسٹس اعجاز انور نے ریمارکس دیئے کہ درخواست گزار کے خلاف ایف آئی درج ہے جس پر ایڈووکیٹ جنرل نے جواب دیا کہ ہمیں تو پتا نہیں ہے کہ کتنی ایف آئی آرز ہیں، ہو سکتا ہے میرے خلاف بھی ایف آئی آرز ہوں۔