ویب ڈیسک(نیشنل ٹائمز)وزیر اعلیٰ پنجاب مریم نواز کے بیان پر آج سندھ بار کونسل نے ہڑتال اور عدالتی کارروائی کے بائیکاٹ کا اعلان کیا ہے۔
وزیر اعلیٰ پنجاب مریم نواز کے بیان پر سندھ بارکونسل کی جانب سے احتجاج کیا گیا، سندھ بار کونسل نے وزیر اعلیٰ پنجاب مریم نواز سے بیانات واپس لینے اور معافی ما نگنے کا مطالبہ کیا ہے۔سندھ بار کونسل کی جانب سے مریم نواز کے بیان پر آج ہڑتال اور عدالتی کارروائی کےبائیکاٹ کا اعلان بھی کیا گیا ہے۔
مریم نواز کا بیان
واضح رہے کہ مریم نواز نے فیصل آباد میں تقریب سے خطاب میں مخالفین کو آڑے ہاتھوں لیتے ہوئے کہا تھا کہ میرا پانی میرا پیسا، کسی کو اس سے کیا تکلیف ہے، پنجاب کو مشورہ دینے والے اپنے مشورے اپنے پاس رکھیں۔مریم نواز کا کہنا تھا این ایف سی میں چاروں صوبوں کو ایک جیسے پیسے ملتے ہیں، آپ پیسے کہاں لگاتے ہیں؟ مانگنے والا سلسلہ اب بند ہو جانا چاہیے، پنجاب نے آپ کے معاملات میں کبھی مداخلت نہیں کی، آپ بھی نہ کریں، آپ کے پاس ہر چیز کا حل کشکول لیکر کھڑے ہو جانا ہے؟
وزیر اعلیٰ پنجاب کے بیان پر پی پی کا سینیٹ اور قومی اسمبلی سے واک آؤٹ
پاکستان پیپلزپارٹی نے وزیراعلیٰ پنجاب مریم نواز کے بیان پر قومی اسمبلی اور سینیٹ سے واک آؤٹ کیا۔قومی اسمبلی اجلاس میں نوید قمر نے اعتراض اٹھایاکہ یہ میرا پانی میرا پیسہ کا کیا مطلب ہے؟ مریم نواز کی تقریر پر بہت افسوس ہوا، پنجاب میں پہلی بار ایسا سیلاب آیا لیکن سندھ کو اس کا تجربہ ہے۔