وہاڑی ( محمد یوسف بھٹی) عالمی یومِ قلب کے موقع پر ڈسٹرکٹ کارڈیالوجسٹ ڈاکٹر محمد فاروق جاوید کی 21 سالہ شاندار خدمات کو زبردست خراج تحسین پیش کیا گیا۔ ڈاکٹر فاروق جاوید دو دہائیوں سے زائد عرصے سے ڈسٹرکٹ ہیڈ کوارٹر اسپتال میں دل کے مریضوں کا علاج اور رہنمائی کرتے ہوئے ہزاروں مریضوں کو نئی زندگی دے چکے ہیں۔ڈاکٹر فاروق جاوید نے شہریوں اورصحافیوں سے گفتگو کرتے ہوئے کہا کہ دل کی بیماریوں سے بچاؤ کے لئے شہریوں کو روزمرہ زندگی میں احتیاطی تدابیر اپنانا ہوں گی، جن میں متوازن غذا کا استعمال، پھل اور سبزیاں کھانا، تیل اور گھی کے زیادہ استعمال سے پرہیز، باقاعدہ ورزش اور تیز قدمی، تمباکو نوشی سے اجتناب اور بلڈ پریشر و شوگر کی باقاعدہ جانچ شامل ہے۔ انہوں نے مزید کہا کہ بروقت معائنہ اور احتیاط ہی دل کے امراض سے محفوظ رہنے کا سب سے مؤثر طریقہ ہے۔ اس موقع پر ملتان چیمبر آف سمال ٹریڈرز اینڈ انڈسٹری کے مختار احمد بھٹی، صدر کریانہ مرچنٹ ایسوسی ایشن حاجی اسلم مدنی، جنرل سیکرٹری گھی ڈیلرز ایسوسی ایشن انوار آفتاب سمیت شہریوں، سول سوسائٹی اور تاجر برادری نے ڈاکٹر فاروق جاوید کی طویل خدمات اور امراضِ قلب کے بارے میں عوامی آگاہی مہم کو خراجِ تحسین پیش کیا۔