حافظ آباد (نیشنل ٹائمز)پاکستان تحریک انصاف کے چیئرمین بیرسٹر گوہر نے کہا ہے کہ یہ سیاست کا وقت نہیں، مصیبت کی گھڑی میں سیلاب متاثرین کی مدد اہم ہے۔
حافظ آباد میں سیلاب سے متاثرہ دیہات میں میڈیا سے گفتگو میں بیرسٹر گوہر کا کہنا تھاکہ سیاست کو ایک طرف رکھ کرسیلاب متاثرین کی مدد کےلیے ایک ہوناضروری ہے۔انہوں نے کہاکہ یہ سیاست کا وقت نہیں، مصیبت کی گھڑی میں سیلاب متاثرین کی مدد اہم ہے، قدرتی آفات سے نمٹنے کے لئے بھی نیشنل ایکشن پلان بنایا جائے، حکومت کی جانب سے سیلاب متاثرین کی امدادی سرگرمیوں سے مطمئن نہیں۔ان کا کہنا تھاکہ اپنے سیلاب متاثرہ بہن بھائیوں کی امداد کے لیے عوام کو نکلنا ہوگا۔پی ٹی آئی چیئرمین کا کہنا تھاکہ ایک مخصوص سیاسی جماعت پرسختیاں بندکی جائیں، 3 سال سے ہم سختیاں برداشت کر رہے ہیں۔انہوں نے کہا کہ میں بانی پی ٹی آئی کے نمائندے کی حیثیت سے آیاہوں، لوگ مجھ پر بےشک تنقید کریں مجھےاس کی کوئی پرواہ نہیں، مجھے بانی پی ٹی آئی کا اعتماد حاصل ہے۔